പിണറായിയെ പറഞ്ഞാൽ പൊള്ളുന്ന യൂത്ത് കോൺഗ്രസ്; പ്രധാനമന്ത്രി പ്രസംഗിച്ച വേദിയിൽ ചാണകവെള്ളം തളിച്ച സംഭവത്തിൽ വിമർശനവുമവയി വി മുരളീധരൻ

തിരുവനന്തപുരം: തൃശൂർ തേക്കിൻകാട് ​മൈതാനത്തിൽ നടന്ന മഹിളാ സംഗമത്തിൽ പ്രധാനമന്ത്രി പ്രസംഗിച്ച വേദിയിൽ യൂത്ത് കോൺഗ്രസ് ചാണക വെള്ളം തളിച്ച സംഭവത്തിൽ രൂക്ഷ വിമർശനമുന്നയിച്ച് കേന്ദ്ര മന്ത്രി വി മുരളീധരൻ. രാജ്യത്തിൻറെ പ്രധാനമന്ത്രി പ്രസംഗിച്ച വേദിയിൽ ചാണകവെള്ളം തളിക്കാനെത്തിയ യൂത്ത് കോൺഗ്രസ് – കെ എസ് യു പ്രവർത്തകരുടെ ജനാധിപത്യബോധത്തിനും സഹിഷ്ണുതയ്ക്കും നല്ല നമസ്കാരമെ​ന്ന് അ‌ദ്ദേഹം പ്രതികരിച്ചു.

പിണറായിയെ പറഞ്ഞപ്പോൾ യൂത്ത് കോൺഗ്രസിന് എന്തിനാണ് പൊള്ളിയതെന്ന് അ‌ദ്ദേഹം ചോദിച്ചു. യൂത്ത് കോൺഗ്രസുകാരുടെ തല ഡിവൈഫ്ഐക്കാർ അടിച്ചുപൊളിച്ചിട്ടും കോൺഗ്രസ് പുലർത്തിയ മൗനവും പരസ്പര ധാരണയുടെ തെളിവാണ്. കോൺഗ്രസും ഇടതുപക്ഷവും ചേർന്ന് കളിക്കുന്ന ഈ വഞ്ചനയുടെ നാടകം തിരിച്ചറിയാൻ കേരളം ഇനിയും വൈകരുതെന്നും അ‌ദ്ദേഹം തന്റെ ഫേസ്ബുക്ക് പോസ്റ്റിൽ കുറിച്ചു.

ഫേസ്ബുക്ക് പോസ്റ്റിന്റെ പൂർണരൂപം

പിണറായിയെ പറഞ്ഞാൽ പൊള്ളുന്ന യൂത്ത് കോൺഗ്രസ് !

‘വെറുപ്പിൻറെ ചന്തയിൽ സ്നേഹത്തിൻറെ കടതുറക്കാൻ നടക്കുന്ന’ രാഹുൽഗാന്ധിയുടെ പാർട്ടിക്കാർ ഇന്ന് തൃശൂരിൽ തുറന്നത് സ്നേഹത്തിൻറെ കടയാണോ?
രാജ്യത്തിൻറെ പ്രധാനമന്ത്രി പ്രസംഗിച്ച വേദിയിൽ ചാണകവെള്ളം തളിക്കാനെത്തിയ യൂത്ത് കോൺഗ്രസ് – കെ എസ് യു പ്രവർത്തകരുടെ ജനാധിപത്യബോധത്തിനും സഹിഷ്ണുതയ്ക്കും നല്ല നമസ്കാരം.. ഇതാണോ വയനാട് എം.പി പറയുന്ന “ആശയപരമായ പോരാട്ടം ” ?
ഈ അന്യായങ്ങൾക്ക് അടിത്തറ പാകാനോ ‘ ന്യായ് യാത്ര’ ? പിണറായിയെ പറഞ്ഞപ്പോൾ യൂത്ത് കോൺഗ്രസിന് പൊള്ളിയത് എന്ത് ?
പിണറായി വിജയൻ സർക്കാരിൻറെ കൊള്ളരുതായ്മകൾ എണ്ണിപ്പറഞ്ഞ നരേന്ദ്രമോദി വെറുക്കപ്പെടേണ്ടവനാണെന്ന് കെ.സുധാകരൻറെ യുവതുർക്കികൾ പറയുന്നു..! ഇതെ ‘ഇൻഡി ‘സഖ്യത്തെക്കുറിച്ചാണ്, ഇതേ അവിശുദ്ധ കൂട്ടുകെട്ടിനെക്കുറിച്ചാണ്, ബഹു.പ്രധാനമന്ത്രി തൃശൂരിൽ പറഞ്ഞത്.. !
പിണറായി വിജയൻറെ അഴിമതിയും ധൂർത്തും മൂലം സംസ്ഥാനം സാമ്പത്തിക പ്രതിസന്ധിയിലാവുമ്പോൾ കോൺഗ്രസ് മൗനം പാലിക്കുന്നു..
സർവകലാശാലകളിൽ മുഖ്യമന്ത്രി നടത്തുന്ന അവിഹിത ഇടപെടലുകൾ ഗവർണർ പറയുമ്പോൾ പ്രതിപക്ഷ നേതാവ്‍ ഗവർണർക്കെതിരെ രംഗത്തെത്തുന്നു.. മുഖ്യമന്ത്രിയുടെ മകളുടെ ‘മാസപ്പടി’ ആദായനികുതി വകുപ്പ് കണ്ടെത്തുമ്പോൾ അടിയന്തരപ്രമേയം പോലും അവതരിപ്പിക്കാതെ സതീശനും കൂട്ടരും ഓടിയൊളിക്കുന്നു..
കള്ളപ്പണത്തിനും കള്ളക്കടത്തിനുമെതിരെ ശക്തമായ നടപടിയെടുക്കുമ്പോൾ ” കേന്ദ്രവേട്ട”യെന്ന് ഇരുവരും ഒന്നിച്ച് പാടുന്നു…
യൂത്ത് കോൺഗ്രസുകാരുടെ തല ഡിവൈഫ്ഐക്കാർ അടിച്ചുപൊളിച്ചിട്ടും കോൺഗ്രസ് പുലർത്തിയ മൗനവും പരസ്പര ധാരണയുടെ തെളിവ്..
കോൺഗ്രസും ഇടതുപക്ഷവും ചേർന്ന് കളിക്കുന്ന ഈ വഞ്ചനയുടെ നാടകം തിരിച്ചറിയാൻ കേരളം ഇനിയും വൈകരുത്…
മോദി വിരോധത്താൽ കേന്ദ്രപദ്ധതികൾ ഇവർ ഒത്തുചേർന്ന് അട്ടിമറിക്കുമ്പോൾ ഇരുളടയുന്നത് നാടിൻറെ ഭാവിയെന്ന് മറക്കരുത്…