ലണ്ടൻ: ബ്രിട്ടീഷ് പ്രധാനമന്ത്രി ഋഷി സുനക്കുമായി കൂടിക്കാഴ്ച്ച നടത്തി കേന്ദ്ര പ്രതിരോധ മന്ത്രി രാജ്നാഥ് സിംഗ്. പ്രതിരോധം, സാമ്പത്തിക സഹകരണം എന്നിവയുമായി ബന്ധപ്പെട്ട വിഷയങ്ങളെ കുറിച്ച് ഇരു നേതാക്കളും ചർച്ച ചെയ്തു. സമാധാനപരവും സുസ്ഥിരവുമായ ആഗോള നിയമങ്ങൾ ശക്തിപ്പെടുത്തുന്നതിന് ഇന്ത്യയ്ക്കും യുകെയ്ക്കും എങ്ങനെ ഒരുമിച്ച് പ്രവർത്തിക്കാം എന്നതിനെക്കുറിച്ചും ഇരുവരും സംസാരിച്ചു.
‘ ബ്രിട്ടീഷ് പ്രധാനമന്ത്രി ഋഷി സുനക്കുമായി ലണ്ടനിൽ കൂടിക്കാഴ്ച നടത്തി. അദ്ദേഹവുമായി വിപുലമായ വിഷയങ്ങൾ ചർച്ച ചെയ്യാൻ അവസരം ലഭിച്ചു. പ്രതിരോധവുമായി ബന്ധപ്പെട്ട വിഷയങ്ങൾ ഞങ്ങൾ ചർച്ച ചെയ്തു. സാമ്പത്തിക സഹകരണവും സമാധാനപരവും സുസ്ഥിരവുമായ ആഗോള നിയമങ്ങളെ ശക്തിപ്പെടുത്തുന്നതിന് ഇന്ത്യയ്ക്കും യുകെയ്ക്കും എങ്ങനെ ഒരുമിച്ച് പ്രവർത്തിക്കാനാകും എന്നതിനെ കുറിച്ചും ചർച്ച ചെയ്തു’- പ്രതിരോധ മന്ത്രി ട്വിറ്ററിൽ കുറിച്ചു.
20 വർഷത്തിനു ശേഷമാണ് ഇന്ത്യൻ പ്രതിരോധ മന്ത്രി യുകെ സന്ദർശിക്കുന്നത്. നേരത്തെ, ബ്രിട്ടീഷ് വിദേശകാര്യ സെക്രട്ടറി ഡേവിഡ് കാമറൂണുമായി പ്രതിരോധ മന്ത്രി കൂടിക്കാഴ്ച്ച നടത്തിയിരുന്നു. ഇരു രാജ്യങ്ങളും തമ്മിലുള്ള ബന്ധം ദൃഢമാക്കുന്നതുമായി ബന്ധപ്പെട്ട് ഇരുവരും ചർച്ചകൾ നടത്തുകയും ചെയ്തു. ലണ്ടനിലെ ട്രിനിറ്റി ഹൗസിൽ നടന്ന ഇന്ത്യ-യുകെ ഡിഫൻസ് ഇൻഡസ്ട്രി സിഇഒമാരുടെ വട്ടമേശ സമ്മേളനത്തിൽ രാജ്നാഥ് സിംഗ് പങ്കെടുത്തിരുന്നു.
കഴിഞ്ഞ ദിവസം രാജ്നാഥ് സിംഗ് പ്രതിരോധ രംഗത്തെ സഹകരണം മെച്ചപ്പെടുത്താൻ അമേരിക്കയിൽ എത്തിയിരുന്നു. ഇതിന് പിന്നാലെയാണ് ബ്രിട്ടണിൽ എത്തിയത്. അമേരിക്കയിൽ അദ്ദേഹം പ്രതിരോധ സെക്രട്ടറി ഗ്രാൻഡ് ഷാപ്പ്സുമായി കൂടിക്കാഴ്ച നടത്തി. പ്രതിരോധ രംഗത്തെ സഹകരണം ദൃഢമാക്കുന്നതുമായി ബന്ധപ്പെട്ട വിഷയങ്ങൾ ചർച്ച ചെയ്തു. അമേരിക്കയുമായി സുപ്രധാനമായ രണ്ട് കരാറുകളിലും ഒപ്പുവച്ചിരുന്നു.
Discussion about this post