ഇസ്ലാമബാദ് : ഇറാനിൽ അടുത്തിടെ നടന്ന ഭീകരാക്രമണത്തിൽ പങ്കുണ്ടെന്ന് കരുതപ്പെടുന്ന പാകിസ്താനിലെ സുന്നി തീവ്രവാദ സംഘടനയെ ലക്ഷ്യമിട്ട് കനത്ത മിസൈൽ ആക്രമണം നടത്തി ഇറാൻ. മിസൈൽ ആക്രമണത്തിൽ രണ്ട് കുട്ടികൾ കൊല്ലപ്പെട്ടു എന്നും കനത്ത നാശനഷ്ടം ഉണ്ടായി എന്നും പാകിസ്താൻ മീഡിയ റിപ്പോർട്ട് ചെയ്തു. എന്നാൽ കൂടുതൽ വിവരങ്ങൾ ലഭ്യമല്ല.
ഇന്ത്യൻ വിദേശകാര്യ വകുപ്പ് മന്ത്രി എസ് ജയശങ്കറിന്റെ സന്ദർശനം കഴിഞ്ഞ് ഏതാണ്ട് 24 മണിക്കൂർ പൂർത്തിയാകുമ്പോഴേക്കും ആണ് ഇറാൻ പാകിസ്താൻ അതിർത്തിയിൽ മിസൈൽ ആക്രമണം നടത്തിയത്. ഇന്ത്യൻ വിദേശ കാര്യ വകുപ്പ് മന്ത്രി ഇറാനിലുണ്ടായ ആക്രമണവുമായി ബന്ധപ്പെട്ട എന്തെങ്കിലും രഹസ്യാന്വേഷണ വിവരങ്ങൾ കൈമാറിയിട്ടുണ്ടോ അതോ സ്വാഭാവികമായ ആക്രമണം ആണോ നടന്നത് എന്ന് വ്യക്തമല്ല. എങ്കിലും രണ്ടു സംഭവങ്ങളും നടന്ന സമയങ്ങൾ തമ്മിലുള്ള ദൂരക്കുറവ് ഒരുപാട് സംശയങ്ങൾ വിവിധ കോണുകളിൽ നിന്നും ഉയരുന്നുണ്ട്
സുന്നി തീവ്രവാദി ഗ്രൂപ്പായ ജെയ്ഷ് അൽ-ആദലിന്റെ താവളങ്ങൾ ലക്ഷ്യമിട്ടായിരുന്നു ആക്രമണമെന്ന് ഇറാനിൽ പരക്കെ റിപ്പോർട്ട് ചെയ്യപ്പെട്ടെങ്കിലും, ഇറാനിയൻ മാധ്യമങ്ങളിൽ ആക്രമണത്തെക്കുറിച്ചുള്ള പരാമർശങ്ങൾ വളരെ പെട്ടെന്ന് തന്നെ അപ്രത്യക്ഷമായി.
വ്യോമാക്രമണത്തിൽ രണ്ട് കുട്ടികൾ കൊല്ലപ്പെടുകയും മറ്റ് മൂന്ന് പേർക്ക് പരിക്കേൽക്കുകയും ചെയ്തതായി പാകിസ്ഥാൻ വിദേശകാര്യ മന്ത്രാലയം പറഞ്ഞു, “പ്രകോപനരഹിതമായ വ്യോമാതിർത്തി ലംഘിച്ചതിൽ” പ്രതിഷേധിക്കാൻ ഇസ്ലാമാബാദിലെ ടെഹ്റാനിലെ മുതിർന്ന നയതന്ത്രജ്ഞനെ പാകിസ്താൻ വിളിച്ചുവരുത്തുകയും ചെയ്തു. മിസൈൽ ആക്രമണത്തിന്റെ കൂടുതൽ വിശദാംശങ്ങൾ പാകിസ്താൻ വിദേശകാര്യ മന്ത്രാലയം നൽകിയിട്ടില്ലെങ്കിലും ഇരുരാജ്യങ്ങളും തമ്മിലുള്ള 1,000 കിലോമീറ്റർ അതിർത്തിയിൽ സ്ഥിതിചെയ്യുന്ന ബലൂചിസ്ഥാൻ പ്രവിശ്യയെ ലക്ഷ്യമിട്ടാണ് മിസൈൽ, ഡ്രോൺ ആക്രമണങ്ങൾ നടത്തിയതെന്ന് പാകിസ്ഥാൻ സോഷ്യൽ മീഡിയ അക്കൗണ്ടുകൾ വിശേഷിപ്പിച്ചു.
അതിർത്തി പ്രദേശത്തെ ബലൂചി വിഘടനവാദികളുടെയും മറ്റ് തീവ്രവാദ ഗ്രൂപ്പുകളുടെയും പ്രവർത്തനങ്ങൾ കാരണം ഇറാനും പാകിസ്ഥാനും തമ്മിൽ വളരെക്കാലമായി അത്ര സുഖകരമായ ബന്ധമല്ല നിലവിലുള്ളത് , എങ്കിലും ഇപ്പോൾ നടന്ന മിസൈൽ ആക്രമണത്തിലൂടെ ഇരു രാജ്യങ്ങളും തമ്മിലുള്ള ബന്ധം വളരെയധികം വഷളാകും എന്ന് ഉറപ്പാണ്.
ജനുവരി 3 ന് ഇറാനിലെ കെർമാൻ നഗരത്തിലുണ്ടായ ഇരട്ട ചാവേർ ബോംബാക്രമണത്തിൽ 80-ലധികം ഇറാനികൾ കൊല്ലപ്പെട്ടിരുന്നു, ആ ആക്രമണത്തിന്റെ ഉത്തരവാദിത്തം ഇസ്ലാമിക് സ്റ്റേറ്റ് (ഐഎസ്) ഏറ്റെടുത്തിരുന്നു. തുടർന്ന് തങ്ങളുടെ ശത്രുക്കൾക്കെതിരായ പ്രതികാര നടപടികളുടെ ഭാഗമായി സിറിയയിലും ഇറാഖിലും ഇറാൻ മിസൈൽ ആക്രമണം നടത്തി ഒരു ദിവസത്തിനുള്ളിൽ തന്നെയാണ് പാകിസ്ഥാനിലും മിസൈൽ ആക്രമണം ഉണ്ടായിരിക്കുന്നത്. എങ്കിലും പാകിസ്താനിലെ സുന്നി തീവ്രവാദ സംഘടനയായ ജെയ്ഷ് അൽ-അദ്ലും ഇറാൻ ആക്രമണത്തിൽ ഉൾപ്പെട്ടിട്ടുണ്ടെന്ന് ടെഹ്റാൻ വിശ്വസിക്കുന്നുണ്ടോ, അതോ പ്രതികാരത്തിനുള്ള ആഭ്യന്തര ആഹ്വാനങ്ങൾ തൃപ്തിപ്പെടുത്താൻ ശത്രുക്കൾക്കെതിരെ ആഞ്ഞടിച്ചതാണോ എന്ന് വ്യക്തമല്ല.
ഗാസയിലെ സംഘർഷങ്ങൾക്ക് ഇറാന്റെ മിസൈൽ ആക്രമണവുമായി പ്രത്യക്ഷത്തിൽ ബന്ധം ഒന്നുമില്ലെങ്കിലും നിലവിൽ തന്നെ താറുമാറായി കിടക്കുന്ന പശ്ചിമേഷ്യയിലെ സാഹചര്യങ്ങൾ ഒന്ന് കൂടി വഷളാകും എന്ന് ഉറപ്പായിരിക്കുകയാണ്.
