എറണാകുളം : കോൺഗ്രസ് ഗരീബി ഹഠാവോ മുദ്രാവാക്യം മാത്രമാണ് ജനങ്ങൾക്ക് നൽകിയത് എന്ന് പ്രധാനമന്ത്രി നരേന്ദ്രമോദി. എന്നാൽ ബിജെപി അത് പ്രാവർത്തികമാക്കി കാണിച്ചു. രാജ്യത്തെ 25 കോടി ജനങ്ങളെ ദാരിദ്ര്യത്തിൽ നിന്ന് കരകയറ്റാൻ ബിജെപി സർക്കാരിനായി എന്നും പ്രധാനമന്ത്രി വ്യക്തമാക്കി. എറണാകുളത്ത് നടന്ന ശക്തി കേന്ദ്ര സമ്മേളനത്തിൽ സംസാരിക്കുമ്പോൾ ആയിരുന്നു പ്രധാനമന്ത്രിയുടെ ഈ പരാമർശങ്ങൾ.
പത്തുവർഷം മുമ്പ് രാജ്യത്ത് ദുർബലമായ ഒരു സർക്കാർ ആയിരുന്നു ഉണ്ടായിരുന്നത്. അന്ന് രാജ്യത്ത് യഥേഷ്ടം ഉണ്ടായിരുന്നത് ഭീകരാക്രമണങ്ങൾ മാത്രമായിരുന്നു. എന്നാൽ ഇന്ന് ലോകം ഇന്ത്യയെ ലോക സുഹൃത്തായി നോക്കിക്കാണുന്നു. ഗൾഫ് രാജ്യങ്ങളിൽ ഇന്ത്യക്കാരോടുള്ള ബഹുമാനം വർദ്ധിച്ചു. കോൺഗ്രസ് 50 വർഷത്തോളം ദാരിദ്ര്യം തുടച്ചുനീക്കും എന്ന് ജനങ്ങളോട് വാഗ്ദാനം നൽകി. എന്നാൽ ബിജെപി സർക്കാർ അധികാരത്തിൽ വന്നതിനു ശേഷം കഴിഞ്ഞ 9 വർഷങ്ങൾ കൊണ്ട് 25 കോടി ജനങ്ങൾ ദാരിദ്ര്യത്തിൽ നിന്ന് കരകയറി. വികസനത്തിനായി നാം തിരഞ്ഞെടുത്തു പാത ശരിയാണെന്നാണ് ഇത് കാണിക്കുന്നത് എന്നും പ്രധാനമന്ത്രി നരേന്ദ്രമോദി വ്യക്തമാക്കി.
തെരഞ്ഞെടുപ്പിനായി ബിജെപി പ്രവർത്തകർ ബൂത്ത് തലത്തിൽ തന്നെ കഠിനപ്രയത്നം ആരംഭിക്കണമെന്നും മോദി സൂചിപ്പിച്ചു. നമ്മുടെ ബൂത്തിൽ നമ്മൾ വിജയിക്കും എന്നതായിരിക്കണം നമ്മുടെ ദൃഢനിശ്ചയം. അഴിമതിയുടെ ചരിത്രമാണ് കേരളത്തിലെ എൽഡിഎഫിനും യുഡിഎഫിനും ഉള്ളത്. അത് കൃത്യമായി ജനങ്ങളിലേക്ക് എത്തിക്കണം. ഓരോ വോട്ടറെയും കൃത്യമായി ശ്രദ്ധിക്കുകയും കഠിനാധ്വാനം ചെയ്യുകയും വേണമെന്നും പ്രധാനമന്ത്രി നരേന്ദ്രമോദി ബിജെപി പ്രവർത്തകരോട് ആവശ്യപ്പെട്ടു.
