ഏറെ കോലാഹലങ്ങൾ സൃഷ്ടിച്ച സിഎംആർഎൽ – എക്സാലോജിക് മാസപ്പടി, ഹവാല വിവാദങ്ങളിൽ നിർണായക വഴിതിരിവ്. ഹൈക്കോടതി ഉത്തരവിനെ തുടർന്ന് വിജിലൻസ് ആൻഡ് ആന്റി കറപ്ഷൻ ബ്യൂറോ രണ്ട് എഫ്‌ഐആറുകൾ രജിസ്റ്റർ ചെയ്ത് ഔദ്യോഗികമായി അന്വേഷണം ആരംഭിച്ചു. അഴിമതി നിരോധന നിയമപ്രകാരവും കള്ളപ്പണ ഇടപാട് തടയുന്ന നിയമപ്രകാരവുമാണ് കേസുകൾ എടുത്തിട്ടുള്ളത്. മാസപ്പടി കേസിൽ മുൻ മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയനെ ഒന്നാം പ്രതിയാക്കിയപ്പോൾ, രണ്ടാമത്തെ ഹവാല/അഴിമതി കേസിൽ മുൻ മന്ത്രി പി.എ. മുഹമ്മദ് റിയാസാണ് ഒന്നാം പ്രതി. വിവാദമായ മാസപ്പടി ഇടപാടിൽ ടി. വീണ രണ്ട് കേസുകളിലും പ്രതിസ്ഥാനത്തുണ്ട്.
എൻഫോഴ്‌സ്‌മെന്റ് ഡയറക്ടറേറ്റ് (ED) കൈമാറിയ വിവരങ്ങളുടെയും തെളിവുകളുടെയും അടിസ്ഥാനത്തിൽ പ്രാഥമിക അന്വേഷണം നടത്താതെ നേരിട്ട് എഫ്‌ഐആർ രജിസ്റ്റർ ചെയ്യണമെന്ന ഹൈക്കോടതി സിംഗിൾ ബെഞ്ച് ഉത്തരവിനെ തുടർന്നാണ് വിജിലൻസിന്റെ ഈ കടുത്ത നടപടി. ഔദ്യോഗിക പദവി ദുരുപയോഗം ചെയ്ത് സാമ്പത്തിക നേട്ടമുണ്ടാക്കിയെന്ന കണ്ടെത്തലിന്റെ അടിസ്ഥാനത്തിലാണ് പിണറായി വിജയനെതിരെ അഴിമതി നിരോധന നിയമത്തിലെ വിവിധ വകുപ്പുകൾ പ്രകാരം കേസെടുത്തിരിക്കുന്നത്. കേസിൽ അന്വേഷണത്തിനായി പ്രത്യേക അന്വേഷണ സംഘത്തെയും (SIT) രൂപീകരിച്ചിട്ടുണ്ട്.
അതേസമയം, വിജിലൻസ് നടപടിക്കെതിരെ നിയമപരമായ പ്രതിരോധവുമായി മുന്നോട്ടുപോകാൻ പിണറായി വിജയൻ തീരുമാനിച്ചിട്ടുണ്ട്. ഹൈക്കോടതി സിംഗിൾ ബെഞ്ച് ഉത്തരവിനെതിരെയും എഫ്‌ഐആറിനെതിരെയും അദ്ദേഹം ഇന്ന് തന്നെ അപ്പീൽ നൽകിയേക്കും. തന്റെയോ മറ്റ് കക്ഷികളുടെയോ വാദങ്ങൾ കേൾക്കാതെയാണ് സിംഗിൾ ബെഞ്ച് ഉത്തരവിറക്കിയതെന്നും, ലളിതകുമാരി കേസ് വിധിയുടെ അന്തസ്സത്തയ്ക്ക് വിരുദ്ധമാണ് നടപടിയെന്നും ഹർജിയിൽ ചൂണ്ടിക്കാണിക്കും.
