പാകിസ്ഥാൻ ക്രിക്കറ്റ് ബോർഡ് (പിസിബി) സംഘടിപ്പിച്ച സ്കൂൾ തല ടൂർണമെന്റിൽ സെഞ്ചുറി നേടി ശ്രദ്ധേയനായി കറാച്ചിയിൽ നിന്നുള്ള ആദം ഗിൽക്രിസ്റ്റ് എന്ന കൗമാരതാരം. മുൻ ഓസ്‌ട്രേലിയൻ വിക്കറ്റ് കീപ്പർ ബാറ്ററായ ആദം ഗിൽക്രിസ്റ്റിന്റെ പേരുള്ള ഈ പതിനാലുകാരൻ കമ്രാൻ പബ്ലിക് സ്കൂളിനായി ഹാപ്പി പാലസ് ഗ്രാമർ സ്കൂളിനെതിരെയാണ് 108 പന്തിൽ നിന്ന് 117 റൺസ് നേടിയത്. 11 ഫോറുകൾ അടങ്ങുന്നതായിരുന്നു താരത്തിന്റെ ഇന്നിംഗ്സ്. ഗിൽക്രിസ്റ്റിന്റെ ബാറ്റിംഗ് മികവിൽ 40 ഓവറിൽ 4 വിക്കറ്റ് നഷ്ടത്തിൽ 297 റൺസ് അടിച്ചുകൂട്ടിയ കമ്രാൻ സ്കൂൾ 172 റൺസിന്റെ വൻ വിജയം സ്വന്തമാക്കി. ടീം നേടിയ ആകെയുള്ള റൺസിന്റെ 39 ശതമാനത്തിലധികവും ഈ യുവതാരത്തിന്റെ ബാറ്റിൽ നിന്നായിരുന്നു.
ഓസ്‌ട്രേലിയൻ ക്രിക്കറ്റ് ടീമിന്റെ തീവ്ര ആരാധകനായ പിതാവാണ് മകന് ഗിൽക്രിസ്റ്റ് എന്ന് പേരിട്ടത്. ആദം എന്ന് വിളിച്ചത് അമ്മയുമായിരുന്നു. പേര് പോലെ തന്നെ ഓസ്‌ട്രേലിയൻ ഇതിഹാസവുമായി നിരവധി സാമ്യതകൾ ഈ കൊച്ചുമിടുക്കനുണ്ട്. ഇരുവരും ഇടങ്കയ്യൻ വിക്കറ്റ് കീപ്പർ ബാറ്ററന്മാരാണെന്ന് മാത്രമല്ല, സ്വന്തം ടീമിനായി ഇന്നിംഗ്സ് ഓപ്പൺ ചെയ്യുന്നതും ഈ കറാച്ചി സ്വദേശിയാണ്. എന്നാൽ ഓസ്‌ട്രേലിയൻ ഇതിഹാസത്തിന്റെ പേരാണ് ഉള്ളതെങ്കിലും മുൻ ശ്രീലങ്കൻ നായകൻ കുമാർ സംഗക്കാരയാണ് തന്റെ എക്കാലത്തെയും വലിയ റോൾ മോഡലെന്നും സംഗക്കാരയെപ്പോലെ ആകാനാണ് ആഗ്രഹിക്കുന്നതെന്നും മത്സരശേഷം ഗിൽക്രിസ്റ്റ് വെളിപ്പെടുത്തി.
പാകിസ്ഥാനിലെ 100 ജില്ലകളിലായി 1400-ലധികം സ്കൂളുകളിൽ നിന്നായി 21,000-ത്തോളം കുട്ടികളാണ് പിസിബി സംഘടിപ്പിക്കുന്ന ഈ സ്കൂൾ തല ടൂർണമെന്റിൽ പങ്കെടുക്കുന്നത്. രാജ്യത്തെ വളർന്നുവരുന്ന യുവ പ്രതിഭകൾക്ക് തങ്ങളുടെ കഴിവുകൾ തെളിയിക്കാനും ജൂനിയർ തല ദേശീയ ടീമുകളിലേക്ക് വഴിതുറക്കാനും ലക്ഷ്യമിട്ടാണ് പിസിബി ഈ വലിയ ടൂർണമെന്റ് സംഘടിപ്പിച്ചിരിക്കുന്നത്.
