2026-ലെ ഐസിസി ടി20 ലോകകപ്പിൽ തകർപ്പൻ പ്രകടനം കാഴ്ചവെച്ചെങ്കിലും ഇന്ത്യൻ ടി20 ടീമിൽ സഞ്ജു സാംസന്റെ സ്ഥാനം ഇനിയും സുരക്ഷിതമല്ല. ലോകകപ്പിന് ശേഷമുള്ള മത്സരങ്ങളിൽ സഞ്ജുവിന്റെ ബാറ്റിംഗ് പ്രകടനം അസ്ഥിരമാണെന്ന് വിലയിരുത്തപ്പെടുന്നു. ചില മികച്ച ഇന്നിംഗ്സുകൾ കളിക്കാൻ സാധിച്ചെങ്കിലും പലപ്പോഴും ഒറ്റയക്ക സ്കോറുകളിൽ പുറത്താകുന്നതാണ് താരത്തിന് തിരിച്ചടിയാകുന്നത്. ലോകകപ്പിന് ശേഷമുള്ള സഞ്ജുവിന്റെ പ്രകടനങ്ങളെയും ടീമിലെ പുതിയ വെല്ലുവിളികളെയും കുറിച്ചുള്ള വിവരങ്ങൾ പരിശോധിക്കാം.
കഴിഞ്ഞ ടി20 ലോകകപ്പിന്റെ ആദ്യ ഘട്ടങ്ങളിൽ ബെഞ്ചിലിരിക്കേണ്ടി വന്നെങ്കിലും പിന്നീട് ശക്തമായ തിരിച്ചുവരവാണ് സഞ്ജു നടത്തിയത്. ഇന്ത്യയെ കിരീടത്തിലേക്ക് നയിക്കുന്നതിൽ നിർണ്ണായകമായ മൂന്ന് തുടർച്ചയായ അർദ്ധശതതങ്ങൾക്കും മേലുള്ള പ്രകടനങ്ങൾ താരം പുറത്തെടുത്തു.
വെസ്റ്റ് ഇൻഡീസിനെതിരായ സെമിഫൈനലിന് തുല്യമായ മത്സരത്തിൽ പുറത്താകാതെ 97 റൺസ് നേടിയ സഞ്ജു, ഇംഗ്ലണ്ടിനെതിരായ സെമിയിലും ന്യൂസിലൻഡിനെതിരായ ഫൈനലിലും 89 റൺസ് വീതം നേടി തിളങ്ങി. മൊത്തം അഞ്ച് ഇന്നിംഗ്സുകളിൽ നിന്നായി 321 റൺസ് അടിച്ചുകൂട്ടിയ താരം 199.37 എന്ന ഉയർന്ന സ്ട്രൈക്ക് റേറ്റോടെ പ്ലെയർ ഓഫ് ദി ടൂർണമെന്റ് പുരസ്കാരവും സ്വന്തമാക്കി.എന്നാൽ ലോകകപ്പിന് ശേഷം സഞ്ജുവിന്റെ ഫോം വലിയ തോതിൽ മങ്ങുന്ന കാഴ്ചയാണ് കണ്ടത്.
ലോകകപ്പിന് ശേഷം കളിച്ച 13 ടി20 മത്സരങ്ങളിൽ നിന്ന് 20.3 ശരാശരിയിൽ 158.08 സ്ട്രൈക്ക് റേറ്റോടെ 264 റൺസ് മാത്രമാണ് അദ്ദേഹത്തിന് നേടാനായത്. ഈ മത്സരങ്ങളിൽ മൂന്ന് അർദ്ധശതവങ്ങൾ നേടിയിട്ടുണ്ടെങ്കിലും, ഒൻപത് തവണയും 12 റൺസിന് താഴെ പുറത്താകാനാണ് താരത്തിന് വിധിയായത്.സഞ്ജുവിന്റെ ഈ മോശം ഫോമിനിടയിലാണ് ഇന്ത്യയുടെ 15 കാരനായ യുവപ്രതിഭ വൈഭവ് സൂർയവംശി ദേശീയ ടീമിലേക്ക് കടന്നുവരുന്നത്.
ഐപിഎല്ലിലെ മിന്നുന്ന പ്രകടനമാണ് വൈഭവിന് ഇന്ത്യൻ ടീമിലേക്കുള്ള വഴിതുറന്നത്. ഇന്ത്യയുടെ മറ്റൊരു പ്രധാന ഓപ്പണറായ അഭിഷേക് ശർമ്മ ലോകകപ്പിന് ശേഷം 31.47 ശരാശരിയിലും 210.56 സ്ട്രൈക്ക് റേറ്റിലും 598 റൺസ് നേടിയിട്ടുണ്ട്. ഇംഗ്ലണ്ടിനും അയർലൻഡിനുമെതിരായ മോശം പ്രകടനത്തെത്തുടർന്ന് സിംബാബ്‌വെ പര്യടനത്തിലുള്ള ഇന്ത്യൻ സ്ക്വാഡിൽ നിന്ന് സഞ്ജു സാംസണെ ഒഴിവാക്കിയിരുന്നു. ആ പരമ്പരയിൽ രണ്ട് അർദ്ധശതവങ്ങൾ നേടി പ്ലെയർ ഓഫ് ദി സീരീസ് ആയത് വൈഭവ് ആയിരുന്നു.
തുടർന്ന് അഫ്ഗാനെതിരായ പരമ്പരയിൽ സഞ്ജു തിരിച്ചെത്തിയെങ്കിലും, ശക്തമായ മത്സരം നിലനിൽക്കുന്നതിനാൽ ഇടവേളകളിലെ മികച്ച പ്രകടനങ്ങൾ മാത്രം കൊണ്ട് സഞ്ജുവിന് ടീമിൽ സ്ഥാനം നിലനിർത്താനാകാത്ത സാഹചര്യമാണുള്ളത്. തന്റെ പ്രകടനത്തിലെ ഇടിവിനെക്കുറിച്ച് പ്രതികരിച്ച സഞ്ജു സാംസൺ, തുടർച്ചയായി മൂന്ന് മോശം ഇന്നിംഗ്സുകൾ വന്നു എന്ന് പറഞ്ഞ് സമയമെടുക്കാനോ ഒഴിവുകഴിവുകൾ പറയാനോ താനില്ലെന്ന് വ്യക്തമാക്കി. തന്റെ പ്രകടനത്തിന്റെ പൂർണ്ണ ഉത്തരവാദിത്തം താൻ ഏറ്റെടുക്കുന്നുവെന്നും, റൺസ് നേടാത്തതിന് മറ്റാരെയും കുറ്റപ്പെടുത്തുന്നില്ലെന്നും താരം കൂട്ടിച്ചേർത്തു. മൈതാനത്തിറങ്ങുമ്പോൾ ടീമിന് വേണ്ടി ചെയ്യേണ്ടത് തന്റെ ജോലിയാണെന്നും സഞ്ജു വ്യക്തമാക്കി.
