ഷില്ലോംഗ്: മേഘാലയയിലെ പൈനാപ്പിൾ കഴിക്കാൻ നല്ല രസമാണെന്ന് കോൺഗ്രസ് നേതാവ് രാഹുൽ ഗാന്ധി. ഭാരത് ജോഡോ നയാ യാത്രയുടെ ഭാഗമായി സംസ്ഥാനത്ത് എത്തിയതായിരുന്നു കോൺഗ്രസ് നേതാവ്. അമ്മ സോണിയയ്ക്കും മേഘാലയയിൽ നിന്നുള്ള പൈനാപ്പിൾ നൽകുമെന്നും രാഹുൽ പറഞ്ഞു.
കാർ യാത്രയ്ക്കിടെ വഴിയരികിൽ ഒരു അമ്മയും മകളും ചേർന്ന് പൈനാപ്പിൾ വിൽക്കുന്നത് കണ്ടു. വണ്ടി നിർത്തി അത് വാങ്ങി രുചിച്ചു. എന്റെ ജീവിതത്തിൽ ഇത്രയും രുചിയുള്ള പൈനാപ്പിൾ കഴിച്ചിട്ടില്ല. അത്രയ്ക്ക് രുചിയേറിയ പൈനാപ്പിൾ. ഉടൻ തന്നെ അമ്മയെ വിളിച്ചു. ലോകത്തിലെ തന്നെ ഏറ്റവും രുചിയേറിയ പൈനാപ്പിൾ അമ്മയ്ക്ക് കൊണ്ടുവരുന്നുണ്ടെന്ന് പറഞ്ഞുവെന്നും രാഹുൽ വ്യക്തമാക്കി.
പൈനാപ്പിളിന് ഇത്രയേറെ രുചിയുണ്ടായിട്ടും രാജ്യത്തിന് പുറത്ത് ഇവ വിറ്റഴിക്കാൻ സാധിക്കാത്തത് എന്തുകൊണ്ടാണ്?. ലോകത്തിലെ ആർക്കും ഇത്രയും നല്ല പൈനാപ്പിൾ കഴിക്കാൻ സാധിക്കില്ല. കാരണം ഇത് വിദേശത്തേക്ക് കയറ്റുമതി ചെയ്യാനുള്ള സൗകര്യം നമ്മുടെ രാജ്യത്ത് ഇല്ല. കർഷകർക്കും, സംരംഭകർക്കും എല്ലാവിധ സൗകര്യങ്ങളും ലഭിക്കുന്ന ഒരു രാജ്യം ആകണം നമ്മുടെ ലക്ഷ്യമെന്നും രാഹുൽ കൂട്ടിച്ചേർത്തു.
