ന്യൂഡല്‍ഹി: ഇന്ത്യന്‍ ഭരണഘടന തയ്യാറാക്കിയവര്‍ക്ക് പ്രചോദനത്തിന്റെ ഉറവിടമായിരുന്നു ശ്രീരാമന്റെ ഭരണമെന്ന് പ്രധാനമന്ത്രി നരേന്ദ്ര മോദി. ഇന്ത്യന്‍ ഭരണഘടനയെ ജീവനുള്ള രേഖയായിട്ടാണ് വിശേഷിപ്പിക്കുന്നതെന്നും പ്രധാനമന്ത്രി പറഞ്ഞു. ഇന്ത്യന്‍ ഭരണഘടന വളരെയധികം ചിന്തകള്‍ക്കും ചര്‍ച്ചകള്‍ക്കുമൊടുവിലാണ് എഴുതിച്ചേര്‍ക്കപ്പെട്ടതെന്നും പ്രധാനമന്ത്രി കൂട്ടിച്ചേര്‍ത്തു.പ്രതിമാസ റേഡിയോ പരിപാടിയായ മന്‍ കി ബാത്തില്‍ സംസാരിക്കുകയായിരുന്നു അദ്ദേഹം.
‘ഭരണഘടനയുടെ മൂന്നാം അദ്ധ്യായത്തില്‍ ഇന്ത്യന്‍ പൗരന്റെ മൗലികാവകാശങ്ങള്‍ വിവരിച്ചിട്ടുണ്ട് . രസകരമായ കാര്യം മൂന്നാം അദ്ധ്യായത്തിന്റെ തുടക്കത്തില്‍ നമ്മുടെ ഭരണഘടന നിര്‍മ്മാതാക്കള്‍ ഭഗവാന്‍ രാമന്റെയും , സീത ദേവിയുടെയും , ലക്ഷ്മണന്റെയും ചിത്രങ്ങള്‍ കൊടുത്താണ് തുടങ്ങിയിരിക്കുന്നത്. ശ്രീരാമന്റെ ഭരണം ഭരണഘടനാ നിര്‍മ്മാതാക്കള്‍ക്ക് പ്രചോദനം നല്‍കുന്നതായിരുന്നു എന്നതിനുള്ള തെളിവാണ് ഇതെന്ന് പ്രധാനമന്ത്രി പറഞ്ഞു. അതുകൊണ്ടാണ് ജനുവരി 22 ന് അയോദ്ധ്യയില്‍ രാജ്യത്തിന്റ നാഥന്‍, രാം സേ രാഷ്ട്ര (രാമന്‍ രാജ്യത്തേക്ക്) എന്നിവയെക്കുറിച്ച് സംസാരിച്ചത് എന്നും പ്രധാനമന്ത്രി വ്യക്തമാക്കി.
അയോദ്ധ്യയിലെ പ്രതിഷ്ഠ രാജ്യത്തെ കോടിക്കണക്കിന് ജനങ്ങളെ ഒരുമിപ്പിച്ചെന്നും അദ്ദേഹം പറഞ്ഞു. എല്ലാവരുടെയും വികാരം ഒന്നാണ്, എല്ലാവരുടെയും ഭക്തിയും ഒന്നുതന്നെ. എല്ലാവരുടെയും വാക്കുകളില്‍ രാമനുണ്ട്, എല്ലാവരുടെയും ഹൃദയത്തില്‍ രാമനുണ്ട് എന്നും പ്രധാനമന്ത്രി കൂട്ടിച്ചേര്‍ത്തു. രാമക്ഷേത്രത്തിന്റെ പ്രാണപ്രതിഷ്ഠയുടെ പേരില്‍ സമൂഹമാദ്ധ്യമങ്ങളിലൂടെ ഉള്‍പ്പെടെ വര്‍ഗീയ ധ്രുവീകരണത്തിന് ശ്രമിച്ചവര്‍ക്കുളള മറുപടി കൂടിയായി പ്രധാനമന്ത്രിയുടെ വാക്കുകള്‍. കേരളത്തിലെ ഇടത് ആഭിമുഖ്യമുളള ചലച്ചിത്ര പ്രവര്‍ത്തകര്‍ ഉള്‍പ്പെടെ ഭരണഘടനയുടെ ആമുഖത്തിന്റെ പകര്‍പ്പ് പങ്കുവെച്ച് പ്രാണപ്രതിഷ്ഠാ ദിനത്തില്‍ വാര്‍ത്തകളില്‍ ഇടംപിടിക്കാന്‍ ശ്രമിച്ചിരുന്നു.
