ആലപ്പുഴ: രൺജീത്ത് ശ്രീനിവാസൻ കൊലക്കേസിന്റെ അന്വേഷണ സംഘത്തിന് പ്രശംസയുമായി സംസ്ഥാന പോലീസ് മേധാവി ഡോ. ഷെയ്ഖ് ദർവേഷ് സിംഗ്. കോടതി വിധിയിൽ പൂർണ സംതൃപ്തിയുണ്ട്. കേസ് അന്വേഷിച്ച മുഴുവൻ പോലീസ് ഉദ്യോഗസ്ഥരും പ്രശംസയർഹിക്കുന്നുണ്ടെന്ന് പോലീസ് മേധാവി വ്യക്തമാക്കി.
അന്വേഷണ സംഘത്തിലെ മുഴുവൻ പോലീസ് ഉദ്യോഗസ്ഥർക്കും റിവാർഡ് നൽകുവാനും ഉത്തരവായി. മുൻ ആലപ്പുഴ ജില്ലാ പോലീസ് മേധാവിയും വിഐപി സുരക്ഷാ വിഭാഗം ഡെപ്യൂട്ടി കമ്മീഷണറുമായ ജി ജയദേവിന്റെ നേതൃത്വത്തിലുള്ള സംഘമായിരുന്നു അന്വേഷണം നടത്തിയത്.
2021ലാണ് ബിജെപി ഒബിസി മോർച്ച സെക്രട്ടറിയായിരുന്ന അഡ്വ. രൺജീത്ത് ശ്രീനിവാസനെ പട്ടാപ്പകൽ അതിക്രൂരമായി കൊലപ്പെടുത്തിയത്. കേസിൽ മുഴുവൻ പ്രതികൾക്കും കോടതി ഇന്ന് വധശിക്ഷ വിധിച്ചു. 15 പോപ്പുലർ ഫ്രണ്ട് ഭീകരന്മാരും കുറ്റക്കാരാണെന്ന് കോടതി നേരത്തെ കണ്ടെത്തിയിരുന്നു. ഇത്തരത്തിൽ നിഷ്ഠൂരമായ ക്രൂരത നടത്തിയ ഇവർ യാതൊരു ദയയും അർഹിക്കുന്നില്ലെന്ന് വിധിന്യായത്തിൽ ജഡ്ജി വ്യക്തമാക്കി. അപൂർവങ്ങളിൽ അപൂർവമായ കേസാണ് ഇതെന്നും കോടതി ചൂണ്ടിക്കാട്ടി.
Discussion about this post