തിരുവനന്തപുരം: പോലീസ് ഉദ്യോഗസ്ഥർ ജനങ്ങളോട് മാന്യമായി പെരുമാറണമെന്ന് നിർദേശിച്ചുകൊണ്ട് വീണ്ടും സർക്കുലർ പുറത്തിറക്കി സംസ്ഥാന പോലീസ് മേധാവി ഷെയ്ക്ക് ദർവേശ് സാഹിബ്. പോലീസിന്റെ പെരുമാറ്റങ്ങൾ സംബന്ധിച്ച് സർക്കുലർ പുറത്തിറക്കണമെന്ന ഹൈക്കോടതിയുടെ നിർദേശത്തെ തുടർന്നാണ് ഇപ്പോൾ വീണ്ടും സർക്കുലർ പുറത്തിറക്കിയത്. നേരത്തെയും ഇതുസംബന്ധിച്ച് സർക്കുലർ പുറത്തിറക്കിയിരുന്നു.
പരിശീലന സമയത്ത് തന്നെ പൊതുജനങ്ങളോട് മാന്യമായി പെരുമാറുന്നതിനെ കുറിച്ച് പോലീസുകാർക്ക് ബോധവൽക്കരണം നടത്തണമെന്ന് സർക്കുലറിൽ പറയുന്നു. പോലീസിന്റെ പ്രവർത്തനങ്ങളുടെ ഓഡിയോ, വീഡിയോ എന്നിവ പൊതുജനങ്ങൾ പകർത്തുകയാണെങ്കിൽ തടയരുതെന്നും സർക്കുലറിൽ വ്യക്തമാക്കിയിട്ടുണ്ട്. പോലീസ് സേനയിലെ അംഗങ്ങൾ പൊതുജനങ്ങളുമായി ഇടപെടുമ്പോൾ പാലിക്കേണ്ട മര്യാദകളെക്കുറിച്ച് ഇതിന് മുൻപും വിവിധ സർക്കുലറുകളിൽ പരാമർശിച്ചിട്ടുണ്ട്. എന്നാൽ, ഇത് പാലിക്കപ്പെടുന്നില്ലെന്ന് ശ്രദ്ധയിൽ പെട്ടതായും ഉത്തരവിൽ വ്യക്തമാക്കുന്നു.
പൊതുജനങ്ങളോട് മാന്യമായി പെരുമാറാൻ എല്ലാ പോലീസ് ഉദ്യോഗസ്ഥരും ബാദ്ധ്യസ്ഥരാണ്. സഭ്യമായ പദപ്രയോഗങ്ങൾ മാത്രം നടത്തണം. പെരുമാറ്റ ശൈലി സംബന്ധിച്ച് ജില്ലാ പോലീസ് മേധാവിമാർ ബോധവൽക്കരണം നടത്തണം. പോലീസുകാരുടെ പൊതുജനങ്ങളോടുള്ള പെരുമാറ്റം നിരീക്ഷിക്കണം. കുറ്റക്കാർക്കെതിരെ കർശന നടപടി എടുക്കണമെന്നും സർക്കുലറിൽ വ്യക്തമാക്കുന്നു.
പോലീസ് ഉദ്യോഗസ്ഥരുടെ മോശം പെരുമാറ്റത്തെ കുറിച്ച് അടുത്തിടെ നിരവധി പരാതികളാണ് ഉയർന്നു വന്നത്. ഇതു സംബന്ധിച്ചുള്ള വീഡിയോകളും പ്രചരിച്ചിരുന്നു. ഇതേ തുടർന്നാണ് ഹൈക്കോടതി വിഷയത്തിൽ ഇടപെട്ടത്.
Discussion about this post