മുംബൈ :റിസര്വ് ബാങ്ക് റിപ്പോ നിരക്ക് കുറച്ചു. റിപ്പോ നിരക്കില് 0.25 ശതമാനത്തിന്റെ കുറവു വരുത്തി. എട്ടില്നിന്ന് 7.25 ശതമാനമായാണു റിപ്പോ നിരക്ക് കുറച്ചത്. ഇതോടെ ഭവന, വാഹന,വ്യക്തിഗത വായ്പകളുടെ പലിശ നിരക്ക് കുറയും. 2013 മേയിലാണ് ഇതിനു മുമ്പ് റിപ്പോ നിരക്ക് കുറച്ചത്. അപ്രതീക്ഷിതമായിട്ടായിരുന്നു ആര്.ബി.ഐയുടെ നീക്കം.
പണപ്പെരുപ്പ നിരക്ക് കുറഞ്ഞതും ആഗോള വിപണിയില് എണ്ണ വിലയിലുണ്ടായ ഇടിവുമാണ് പൊടുന്നനെ നിരക്ക് കുറയ്ക്കാന് റിസര്വ് ബാങ്കിനെ പ്രേരിപ്പിച്ചത്. എന്നാല് വാണിജ്യബാങ്കുകള് റിസര്വ് ബാങ്കില് നിര്ബന്ധമായും സൂക്ഷിക്കേണ്ട തുകയായ കരുതല് ധനാനുപാതം നാലു ശതമാനമായും വാണിജ്യ ബാങ്കുകളില് നിന്ന് റിസര്വ് ബാങ്കില് കടമെടുക്കുന്പോള് നല്കുന്ന റിവേഴ്സ് റിപ്പോ 6.75 ശതമാനമായും തുടരും.
നേരത്തെ റിപ്പോ നിരക്ക് കുറയ്ക്കാന് ആര്.ബി.ഐയ്ക്കു മേല് വ്യവസായ ലോകം സമ്മര്ദ്ദം ചെലുത്തിയിരുന്നെങ്കിലും പണപ്പെരുപ്പം ചൂണ്ടിക്കാട്ടി ഗവര്ണര് രഘുറാം രാജന് ഇതിന് വഴങ്ങിയിരുന്നില്ല. എന്നാല് പുതിയ നീക്കം ഓഹരി വിപണിയിലും മികച്ച പ്രതിഫലനം സൃഷ്ടിച്ചേക്കും.
Discussion about this post