ഇന്ത്യയുമായുള്ള ദീർഘകാല പ്രതിരോധ പങ്കാളിത്തം കൂടുതൽ ശക്തമാക്കാൻ ലക്ഷ്യമിട്ട്, റഷ്യയുടെ അത്യാധുനിക അടുത്ത തലമുറ യുദ്ധടാങ്കായ ‘ടി-90എംഎസ്’ (T-90MS) ഇന്ത്യയിൽ പ്രാദേശികമായി നിർമ്മിക്കാനുള്ള വമ്പൻ ഓഫറുമായി റഷ്യ രംഗത്ത്. റഷ്യൻ സൈന്യത്തിന്റെ ഏറ്റവും പുതിയ ടി-90എം ടാങ്കുകളുടെ കയറ്റുമതി പതിപ്പായ ടി-90എംഎസ് ഇന്ത്യയിൽ നിർമ്മിക്കാനുള്ള നിർദ്ദേശം റഷ്യയുടെ ഔദ്യോഗിക ആയുധ കയറ്റുമതി ഏജൻസിയായ റോസോബോറോൺ എക്സ്പോർട്ട് (Rosoboronexport) ആണ് മുന്നോട്ട് വെച്ചിരിക്കുന്നത്. ഇരുരാജ്യങ്ങളും തമ്മിലുള്ള പ്രതിരോധ സഹകരണത്തിന്റെ അടുത്ത ഘട്ടമായാണ് മോസ്കോ ഈ നീക്കത്തെ വിശേഷിപ്പിക്കുന്നത്. പ്രധാനമന്ത്രി നരേന്ദ്ര മോദിയുടെ ‘മേക്ക് ഇൻ ഇന്ത്യ’ പദ്ധതിക്ക് വലിയ ഊർജ്ജം പകരുന്നതാണ് റഷ്യയുടെ ഈ പുതിയ വാഗ്ദാനം.
തുടക്കത്തിൽ ടാങ്ക് നിർമ്മാണത്തിനാവശ്യമായ അത്യാധുനിക സാങ്കേതിക കിറ്റുകൾ റഷ്യയിൽ നിന്ന് ഇന്ത്യയിലെത്തിച്ച് ഇവിടെയുള്ള ഓർഡിനൻസ് ഫാക്ടറികളിൽ അസംബിൾ ചെയ്യാനാണ് പദ്ധതി. തുടർന്ന് ഘട്ടം ഘട്ടമായി ടാങ്കുകളുടെ പ്രധാന ഭാഗങ്ങളും ഘടകങ്ങളും ഇന്ത്യയിൽ തന്നെ പൂർണ്ണമായി നിർമ്മിക്കുന്ന രീതിയിലേക്ക് പദ്ധതി വ്യാപിപ്പിക്കുമെന്ന് ആർടി ഇന്ത്യ (RT India) റിപ്പോർട്ട് ചെയ്യുന്നു. ഈ ഘട്ടങ്ങളായുള്ള ഉൽപ്പാദന മാതൃക ഇന്ത്യൻ കരസേനയുടെ കവചിത വ്യൂഹത്തെ (Armoured Fleet) അതിവേഗം ആധുനീകരിക്കാൻ സഹായിക്കുമെന്നാണ് റഷ്യൻ ഏജൻസി വ്യക്തമാക്കുന്നത്. ചൈന, പാകിസ്താൻ അതിർത്തികളിൽ പ്രതിരോധം ശക്തമാക്കാൻ ഇന്ത്യൻ സൈന്യത്തിന് പുതിയ ടാങ്കുകളുടെ വരവ് വലിയ കരുത്താകും.
ഇന്ത്യൻ കരസേന നിലവിൽ ഉപയോഗിക്കുന്ന ഭൂരിഭാഗം ടി-72 ‘അജേയ’, ടി-90 ‘ഭീഷ്മ’ ടാങ്കുകളും റഷ്യൻ ലൈസൻസോടെ ഇന്ത്യയിൽ തന്നെ നിർമ്മിച്ചവയാണ്. പുതിയ ടി-90എംഎസ് ടാങ്കുകളുടെ പല സുപ്രധാന സിസ്റ്റങ്ങളും ഭാഗങ്ങളും ഇന്ത്യയുടെ പക്കലുള്ള ടി-72, ടി-90എസ് പ്ലാറ്റ്ഫോമുകളുമായി ഏറെ സാമ്യമുള്ളവയാണെന്ന് റോസോബോറോൺ എക്സ്പോർട്ട് വക്താവ് ചൂണ്ടിക്കാട്ടി. ഇത് കാരണം പുതിയ ടാങ്കുകൾ ഇന്ത്യൻ സൈന്യത്തിന്റെ ഭാഗമാക്കുന്നതും അവയുടെ അറ്റകുറ്റപ്പണികളും ലോജിസ്റ്റിക്സ് കാര്യങ്ങളും വളരെ എളുപ്പമാകും. റഷ്യൻ യുദ്ധോപകരണങ്ങൾ കൈകാര്യം ചെയ്ത് ദീർഘകാല പരിചയമുള്ള ഇന്ത്യൻ സൈനികർക്ക് പുതിയ ടാങ്കുകളുടെ പരിശീലനവും ഏറെ ലളിതമായിരിക്കുമെന്നാണ് വിലയിരുത്തൽ. നിലവിൽ ആഗോളതലത്തിൽ പ്രതിരോധ ഇറക്കുമതി കുറയ്ക്കാനും ആയുധ നിർമ്മാണത്തിൽ സ്വയംപര്യാപ്തത നേടാനുമുള്ള ഇന്ത്യയുടെ ശ്രമങ്ങൾക്ക് റഷ്യയുടെ ഈ സാങ്കേതികവിദ്യാ കൈമാറ്റ ഓഫർ നിർണ്ണായകമായേക്കും.
