ന്യൂഡൽഹി: വംശീയ സംഘർഷം രൂക്ഷമായ മണിപ്പൂരുമായി ബന്ധപ്പെട്ട് ചില സുപ്രധാന തീരുമാനങ്ങൾ കൈക്കൊള്ളാൻ കേന്ദ്രസർക്കാർ ഒരുങ്ങുന്നതായി വെളിപ്പെടുത്തി മണിപ്പൂർ മുഖ്യമന്ത്രി ബിരേൻ സിംഗ്. ശനിയാഴ്ച ഡൽഹിയിൽ വച്ച് കേന്ദ്ര ആഭ്യന്തര മന്ത്രി അമിത് ഷായുമായി നടത്തിയ കൂടിക്കാഴ്ച നടത്തിയ ശേഷമാണ് ബിരേൻ സിംഗ് ഈ വെളിപ്പെടുത്തൽ നടത്തിയത്.
“നമ്മുടെ സംസ്ഥാനവുമായി ബന്ധപ്പെട്ട പരമപ്രധാനമായ കാര്യങ്ങൾ ഞങ്ങൾ ചർച്ച ചെയ്തു. മണിപ്പൂരിലെ ജനങ്ങളുടെ താൽപ്പര്യങ്ങൾക്കായി ഇന്ത്യാ ഗവൺമെൻ്റ് ചില സുപ്രധാന തീരുമാനങ്ങൾ എടുക്കാൻ ഒരുങ്ങുകയാണ്” അമിത് ഷായുമായുള്ള ചിത്രം പങ്കു വച്ച് കൊണ്ടുള്ള സമൂഹ മാദ്ധ്യമ പോസ്റ്റിൽ ബീരേന് സിംഗ് വെളിപ്പെടുത്തി. തുടർന്ന് ആഭ്യന്തര മന്ത്രാലയത്തിലെ (എംഎച്ച്എ) മുതിർന്ന ഉദ്യോഗസ്ഥരുമായും മണിപ്പൂർ മുഖ്യമന്ത്രി കൂടിക്കാഴ്ച നടത്തി.
ഞായറാഴ്ച മുഖ്യമന്ത്രി മണിപ്പൂരിലേക്ക് തിരിക്കും.മണിപ്പൂരിൻ്റെ വിവിധ കേന്ദ്രങ്ങളിൽ നടന്നുകൊണ്ടിരിക്കുന്ന അക്രമങ്ങൾക്കിടയിൽ, കുക്കി, മെയ്തേയ് ഗ്രൂപ്പുകൾ വ്യത്യസ്ത ആവശ്യങ്ങളുമായാണ് രംഗത്തെത്തുന്നത്. അത് കൊണ്ട് തന്നെ പ്രധാനപ്പെട്ട തീരുമാനങ്ങൾ എന്താണെന്ന് വ്യക്തമല്ല എന്നാണ് ബന്ധപ്പെട്ട വൃത്തങ്ങൾ വ്യക്തമാക്കുന്നത്. എന്ത് തന്നെ ആയാലും, മണിപ്പൂർ വിഷയം ഒരുപാട് കാലം മുന്നോട്ട് കൊണ്ട് പോകാൻ കേന്ദ്രം ആഗ്രഹിക്കുന്നില്ല എന്ന് തന്നെയാണ് ഇപ്പോഴുണ്ടായിരിക്കുന്ന നടപടികൾ വ്യക്തമാക്കുന്നത്.
