ന്യൂഡല്‍ഹി: ലോകസഭ അംഗങ്ങള്‍ക്കും സ്പീക്കര്‍ക്കും നന്ദി പറഞ്ഞ് പ്രധാനമന്ത്രി നരേന്ദ്രമോദി. നിര്‍ണായക തീരുമാനങ്ങള്‍ കൈകൊണ്ട സമ്മേളനകാലമാണ് പൂര്‍ത്തിയാക്കുന്നത് എന്ന് അദ്ദേഹം പറഞ്ഞു. സ്പീക്കര്‍ ഓം ബിര്‍ളയെ പ്രത്യേകം അഭിനന്ദിക്കുകയും ചെയ്തു. സഭയില്‍ പുഞ്ചിരിയോടെയാണ് സ്പീക്കര്‍ എപ്പോഴും അംഗങ്ങളെ നയിച്ചത്. ഒരിക്കല്‍ പോലും പുഞ്ചിരി മുഖത്ത് നിന്ന് മാഞ്ഞില്ല
ദേഷ്യത്തിന്റെയും ആരോപണങ്ങളുടെയും നിമിഷങ്ങള്‍ ഉണ്ടായിരുന്നു, പക്ഷേ ആ സാഹചര്യം ക്ഷമയോടെ നിയന്ത്രിച്ചു. ഇതിന് ഞാന്‍ പ്രത്യേക നന്ദി അറിയിക്കുന്നു എന്ന് പ്രധാനമന്ത്രി കൂട്ടിച്ചേര്‍ത്തു.
നൂറ്റാണ്ടിലെ ഏറ്റവും വലിയ വെല്ലുവിളിയായിരുന്നു കൊവിഡ് എന്നും കൊവിഡിനെ രാജ്യം ഒറ്റക്കെട്ടായി അതിജീവിച്ചെന്നും പ്രധാനമന്ത്രി വ്യക്തമാക്കി. പതിനേഴാം ലോക്‌സഭയുടെ അവസാന ദിവസമായ ഇന്ന് ചടങ്ങില്‍ സംസാരിക്കുകയായിരുന്നു മോദി. രാജ്യം ലോക്‌സഭ തെരഞ്ഞെടുപ്പിലേക്ക് കടക്കുന്നതിനു മുന്നോടിയായുള്ള അവസാന സിറ്റിങ്ങാണ് പാര്‍ലമെന്റിന്റെ ഇരുസഭകളിലും ഇന്ന് നടന്നത്.
അഞ്ച് വര്‍ഷത്തിനിടയില്‍ നിരവധി സുപ്രധാന തീരുമാനങ്ങള്‍ കൈകൊള്ളുകയും , നിരവധി വെല്ലുവിളികളും നേരിടുകയും ചെയ്തു. എന്നാല്‍ ഓരോരുത്തരും അവരുടെ കഴിവിന് അനുസരിച്ച് രാജ്യത്തിന് ശരിയായ ദിശ നല്‍ക്കാന്‍ ശ്രമിച്ചിട്ടുണ്ട് എന്നും അദ്ദേഹം പറഞ്ഞു.ജനുവരി 31 ന് ആരംഭിച്ച ബജറ്റ് സമ്മേളനം വെള്ളിയാഴ്ച വരെയാണ് നിശ്ചിയിച്ചിരുന്നത്. എന്നാല്‍ കഴിഞ്ഞ ദിവസം ശനിയാഴ്ച വരെ നീട്ടുകയായിരുന്നു.
Discussion about this post