ചെന്നൈ: രാജ്യത്തിന് വേണ്ടി ജീവൻ ബലിയർപ്പിച്ച മേജർ മുകുന്ദ് വരദരാജന്റെ ബയോപിക് ‘അമരൻ’ ഉടൻ തീയറ്ററുകളിലെത്തും. കമൽഹാസൻറെ രാജ് കമൽ ഫിലിംസ് നിർമ്മിക്കുന്ന ചിത്രത്തിൽ ശിവകാർത്തികേയനാണ് മുകുന്ദ് ആയി എത്തുന്നത്. കഴിഞ്ഞ ദിവസമാണ് ചിത്രത്തിന്റെ ടീസർ പുറത്തുവന്നത്.
എന്നാൽ, ചിത്രത്തിന്റെ ടീസർ പങ്കുവച്ചുകൊണ്ടുള്ള മേജർ മുകുന്ദിന്റെ ഭാര്യ ഇന്ദു റബേക്ക വർഗീസിന്റെ ഒരു കുറിപ്പാണ് ഇപ്പോൾ വൈറലായിരിക്കുന്നത്.
‘അമരൻ..മരണമില്ലത്തവൻ..ഇത് എങ്ങനെ പറയണമെന്ന് ഞാൻ ആയിരം തവണ ചിന്തിച്ചു, പക്ഷേ എല്ലായ്പ്പോഴും എന്നപോലെ ഞാൻ ഹൃദയത്തെ അത് പറയാൻ പഠിപ്പിച്ചു.ഒരു ദശാബ്ദം കടന്നുപോയി.
ഇപ്പോൾ വെള്ളിത്തിരയിൽ അദ്ദേഹത്തിന്റെ സ്മരണയും ദേശസ്നേഹവും എന്നെന്നേക്കുമായി അനശ്വരമാകുന്ന സമയമാണിത്. ഞാൻ ഈ സിനിമയ്ക്കായി കാത്തിരിക്കുന്നു.പക്ഷേ ഈ ആവേശം എന്നെന്നേക്കുമായി മായാത്ത സങ്കടവും അനന്തമായ സ്നേഹവും അടങ്ങാത്ത പ്രതീക്ഷയും ചേർന്നതാണ്. ഉത്തമമായ ഒരു കാര്യത്തിന് വേണ്ടി വിലപ്പെട്ട ഒരാളെ ന്ഷ്ടപ്പെടുന്നത് എന്താണെന്ന് അറിയുന്ന ഞങ്ങളുടെ കുടുംബങ്ങളോടും എല്ലാ ആത്മാക്കളോടും ഒപ്പം അവരുടെ ശക്തിയിലും ദുഃഖത്തിലും നിലകൊള്ളുന്നു. ജയ് ഹിന്ദ്’-റബേക്ക കുറിച്ചു.
2014 ഏപ്രിൽ 25ന് ദക്ഷിണ കശ്മീരിൽ ഭീകരുമായുള്ള ഏറ്റുമുട്ടലിനിടെയാണ് മേജർ മുകുന്ദ് വരദരാജൻ വീരമൃത്യു വരിച്ചത്. 44 രാഷ്ട്രീയ റൈഫിൾ ബറ്റാലിയനിൽ ആയിരുന്നു മേജർ മുകുന്ദ് വരദരാജൻ പ്രവർത്തിച്ചിരുന്നത്. 2015ൽ രാജ്യം അദ്ദേഹത്തെ അശോക ചക്ര നൽകി ആദരിച്ചു.
രജ് കുമാർ പെരിയസാമിയാണ് ‘അമരൻ’ സംവിധാനം ചെയ്യുന്നത്. സോണി പിക്ചേർസും ചിത്രത്തിന്റെ സഹ നിർമ്മാതാക്കളാണ്. സായി പല്ലവിയാണ് ചിത്രത്തിലെ നായിക. മേജർ മുകുന്ദിന്റെ മൂന്ന് കാലഘട്ടത്തെയാണ് ചിത്രത്തിൽ കാണിക്കുന്നത്.
Discussion about this post