പത്തനംതിട്ട : പ്രതിപക്ഷ നേതാവ് വി ഡി സതീശനെ പരിഹസിക്കുകയും അവഹേളിക്കുകയും ചെയ്യുന്ന രീതിയിൽ ഫ്ലക്സ് ബോർഡ് സ്ഥാപിച്ച് എസ്എഫ്ഐ. പത്തനംതിട്ടയിലെ എസ്എഫ്ഐ പ്രവർത്തകർ ആണ് പ്രതിപക്ഷ നേതാവിനെ പരിഹസിക്കുന്ന ഫ്ലക്സ് ബോർഡ് സ്ഥാപിച്ചത്. ‘മൈ*#*# ഡിയർ സതീശന് പത്തനംതിട്ടയിലേക്ക് സ്വാഗതം’ എന്നെഴുതിയിട്ടുള്ള ഫ്ലക്സിൽ വി ഡി സതീശന്റെയും കെ സുധാകരന്റെയും ചിത്രങ്ങളും ഉണ്ട്.
ആലപ്പുഴയിൽ കോൺഗ്രസിന്റെ സമരാഗ്നി ജാഥയോടനുബന്ധിച്ച് നടന്ന വാർത്താസമ്മേളനത്തിൽ കെ സുധാകരൻ നടത്തിയ പരാമർശത്തെ തുടർന്നാണ് എസ്എഫ്ഐ ഇത്തരത്തിൽ ഒരു ഫ്ലക്സ് ബോർഡ് സ്ഥാപിച്ചിട്ടുള്ളത്. പത്തനംതിട്ട ഗാന്ധി സ്ക്വയറിൽ ആണ് ഇത്തരത്തിൽ പ്രതിപക്ഷ നേതാവിനെ പരിഹസിക്കുന്ന ഫ്ലക്സ് ബോർഡ് എസ്എഫ്ഐ സ്ഥാപിച്ചത്. സംഭവം ശ്രദ്ധയിൽപ്പെട്ടതോടെ യൂത്ത് കോൺഗ്രസ് പ്രവർത്തകർ ഈ ഫ്ലക്സ് ബോർഡ് നശിപ്പിക്കുകയും ചെയ്തു.
കെപിസിസി നേതൃത്വത്തിന്റെ സമരാഗ്നി ജാഥയുടെ ഭാഗമായി കെ സുധാകരനും വി ഡി സതീശനും അടുത്ത ദിവസം പത്തനംതിട്ടയിൽ എത്തുന്ന സാഹചര്യത്തിലാണ് എസ്എഫ്ഐ ഇത്തരത്തിൽ ഒരു ഫ്ലക്സ് ബോർഡ് പത്തനംതിട്ടയിൽ സ്ഥാപിച്ചിരുന്നത്. ആലപ്പുഴയിൽ നടന്ന വാർത്താ സമ്മേളനത്തിനിടയിൽ കെ സുധാകരൻ നടത്തിയ പരാമർശം മാദ്ധ്യമങ്ങളാണ് വിവാദമാക്കിയത് എന്നാണ് ഈ വിഷയത്തിൽ വിഡി സതീശൻ പ്രതികരിച്ചത്. താനും സുധാകരേട്ടനും തമ്മിൽ ജ്യേഷ്ഠാനുജ ബന്ധമാണ് ഉള്ളതെന്നും ആ സ്വാതന്ത്ര്യത്തിലാണ് അദ്ദേഹം അത്തരത്തിൽ ഒരു പരാമർശം നടത്തിയതെന്നുമാണ് വിഡി സതീശൻ വ്യക്തമാക്കുന്നത്.
Discussion about this post