ലക്നൗ: സമുദ്രത്തിനടിയിലെ ദ്വാരക നഗരം സന്ദർശിച്ച് പ്രധാനമന്ത്രി നരേന്ദ്ര മോദി. പുതുതായി നിർമ്മാണം പൂർത്തിയായ സുദർശൻ സേതു തൂക്കുപാലത്തിന്റെ ഉദ്ഘാടനത്തിനായി ജാംനഗറിൽ എത്തിയതായിരുന്നു അദ്ദേഹം. ദ്വാരക നഗരം കണ്ടത് ദൈവീക അനുഭമായിരുന്നു പ്രധാനമന്ത്രി പ്രതികരിച്ചു. ദ്വാരക നഗരം സമുദ്രത്തിനടിയിൽ മുങ്ങിയെന്നാണ് വിശ്വാസം.
പാലം ഉദ്ഘാടനത്തിന് എത്തിയ പ്രധാനമന്ത്രി രാവിലെ ദ്വാരകാധിഷ് ക്ഷേത്രത്തിൽ ദർശനം നടത്തിയിരുന്നു. ഇതിന് പിന്നാലെയാണ് സമുദ്രത്തിനടിയിലെ നഗരം ദർശിച്ചത്. തീര സംരക്ഷണ സേനാ ഉദ്യോഗസ്ഥരുടെ സഹായത്തോടെ സുരക്ഷാ ഉപകരണങ്ങൾ ധരിച്ചായിരുന്നു അദ്ദേഹം ദ്വാരക നഗരം ദർശിച്ചത്. ഇതിന്റെ ചിത്രങ്ങൾ പ്രധാനമന്ത്രി ഏക്സിൽ പങ്കുവച്ചിട്ടുണ്ട്.
ഇന്ന് തനിക്കുണ്ടായ അനുഭവങ്ങൾ ജീവിതത്തിൽ ഒരിക്കലും മറക്കാൻ കഴിയില്ലെന്ന് പ്രധാനമന്ത്രി പറഞ്ഞു. സമുദ്രത്തിനടിയിലെ ദ്വാരക നഗരം സന്ദർശിക്കാൻ അവസരം ഉണ്ടായി. വെള്ളത്തിനടിയിലെ ദ്വാര നഗരത്തെക്കുറിച്ച് പുരാവസ്തു ഗവേഷകർ പലകാര്യങ്ങളും എഴുതിയിട്ടുണ്ട്. ഭംഗിയുള്ള കവാടങ്ങളും വലിയ കെട്ടിടങ്ങളുമുള്ള നഗരമാണ് ദ്വാരകയെന്നാണ് നമ്മുടെ ഗ്രന്ഥങ്ങളിലും ഉള്ളത്. ഭഗവാൻ ശ്രീകൃഷ്ണൻ സ്വന്തമായി നിർമ്മിച്ചതാണ് നഗരമെന്നും അദ്ദേഹം കൂട്ടിച്ചേർത്തു.
സമുദ്രത്തിനടിയിലേക്ക് ഇറങ്ങിച്ചെല്ലാൻ കഴിഞ്ഞു. ദൈവീകത അനുഭവിച്ചറിഞ്ഞു. ദ്വാരകാധിഷിന് മുൻപിൽ നിന്നും അനുഗ്രഹം വാങ്ങി. മയിൽപീലിയുമായാണ് ദ്വാരക നഗരത്തിലേക്ക് ചെന്നത്. ഭഗവാന്റെ കാൽപ്പാദത്തിൽ ഇതർപ്പിച്ചു. വലിയ ആകാംഷയിലായിരുന്നു ദ്വാരകയിലേക്ക് പോയത്. വർഷങ്ങൾ നീണ്ട ആഗ്രഹമാണ് ഇപ്പോൾ നിറവേറിയിരിക്കുന്നത് എന്നും അദ്ദേഹം കൂട്ടിച്ചേർത്തു.
Discussion about this post