തിരുവനന്തപുരം : കേരളതീരത്തിനടുത്ത് കടലിൽ വച്ച് കപ്പൽ ഡക്കിലേക്ക് കയറവേ വഴുതിവീണ തുർക്കി കപ്പലിലെ ജീവനക്കാരന് രക്ഷകരായി വിഴിഞ്ഞം കോസ്റ്റ് ഗാർഡ്. ഞായറാഴ്ചയായിരുന്നു അപകടം നടന്നത്. വിഴിഞ്ഞം തീരത്തുനിന്ന് 35 നോട്ടിക്കൽ മൈൽ അകലെ വെച്ച് തുർക്കി കപ്പലിന്റെ ഡക്കിലേക്ക് കോണിയിലൂടെ കയറവേ ജീവനക്കാരൻ വഴുതി വീഴുകയായിരുന്നു.
വീഴ്ചയെ തുടർന്ന് തുർക്കി സ്വദേശിയായ കപ്പൽ ജീവനക്കാരന്റെ കൈ ഒടിഞ്ഞു. ഉടൻതന്നെ കപ്പലിന്റെ ക്യാപ്റ്റൻ ജീവനക്കാരന് വേണ്ടി വൈദ്യസഹായം അഭ്യർത്ഥിച്ചുകൊണ്ട് സന്ദേശം അയക്കുകയായിരുന്നു. കപ്പലിലെ ഡോക്ടർ പ്രാഥമിക ചികിത്സ നൽകിയെങ്കിലും പരിക്കും വേദനയും തീവ്രമായതിനാൽ കരയിൽ എത്തിച്ച് ചികിത്സ നൽകേണ്ടതാണെന്ന് ക്യാപ്റ്റൻ വിവരമറിയിച്ചു.
തുർക്കി കപ്പലിൽ നിന്നുമുള്ള സന്ദേശം ലഭിച്ച വിഴിഞ്ഞം സ്റ്റേഷൻ കമാൻഡർ ജി ശ്രീകുമാർ ഉടൻതന്നെ കോസ്റ്റ് ഗാർഡ് സംഘത്തെ കപ്പലിനടുത്തേക്ക് അയച്ചു. തുടർന്ന് കോസ്റ്റ് ഗാർഡിന്റെ സി- 441 എന്ന ചെറു കപ്പൽ തുർക്കി കപ്പലിന് അടുത്തേക്ക് അയക്കുകയും ജീവനക്കാരനെ വിഴിഞ്ഞം തുറമുഖത്തേക്ക് എത്തിക്കുകയും ആയിരുന്നു. സിംഗപ്പൂരിൽ നിന്നും ഷാർജയിലേക്ക് 25 ജീവനക്കാരുമായി പോകുകയായിരുന്നു എൽപിജി ടാങ്കർ കപ്പലിലെ ജീവനക്കാരനായ തുർക്കി സ്വദേശി സാലിയാഹ് ഗുൽസനാണ് കപ്പൽ ഡെക്കിൽ നിന്നും വീണ് പരിക്കേറ്റത്.
Discussion about this post