‘ഉഗ്രശബ്ദത്തോടെ പൊട്ടിത്തെറിച്ച ട്രാൻസ്‌ഫോമർ‌ കത്താൻ തുടങ്ങി’ ; പേട്ടയിൽ ട്രാൻസ്ഫോമർ പൊട്ടിത്തെറിച്ച് തീപിടുത്തം

തിരുവനന്തപുരം: പേട്ടയിൽ ട്രാൻസ്ഫോമർ പൊട്ടിത്തെറിച്ച് തീപിടിത്തം. പേട്ട പോലീസ് സ്റ്റേഷനുസമീപം പേട്ട പൊലീസ് സ്റ്റേഷന് സമീപം കണ്ണമ്മൂല-പള്ളിമുക്ക് റോഡില്‍ ആണ് സംഭവം.  ചൊവ്വാഴ്ച രാത്രി 11.15-നാണ് അപകടം നടന്നത്.  നിലവിൽ തീ നിയന്ത്രണവിധേയമാണ്. ആളപായമില്ല.ട്രാൻസ്ഫോമറിൽനിന്നും പുക ഉയരുന്നതുകണ്ടതോടെ സമീപത്തെ കടക്കാരാണ് ആദ്യം പോലീസിൽ വിവരമറിയിച്ചത്. ഇതേ തുടർന്ന് ഫയർ ഫോഴ്സെത്തി

സംഭവത്തെക്കുറിച്ച്‌ പരിസരവാസികള്‍ പറയുന്നത് ഇങ്ങനെയാണ്, ‘ ഇന്നലെ രാവിലെ മുതല്‍ ഇടവിട്ട് വൈദ്യുതി തടസവും ട്രാൻസ്‌ഫോമറില്‍ തീപ്പൊരിയുമുണ്ടായിരുന്നു. വൈദ്യുതി തടസത്തെ തുടർന്ന് റേഷൻകട ഉള്‍പ്പെടെയുള്ള സ്ഥാപനങ്ങളുടെ പ്രവർത്തനത്തെ ബാധിച്ചു. നാട്ടുകാരുടെ പരാതിയുടെ അടിസ്ഥാനത്തില്‍ രാവിലെ 10ഓടെ അസിസ്റ്റന്റ് എൻജിനിയറുടെ നേതൃത്വത്തില്‍ പരിശോധന നടത്തി.

എന്നാല്‍ രാത്രി 10ഓടെ ട്രാൻസ്‌ഫോമറില്‍ നിന്ന് പുക ഉയരാൻ തുടങ്ങി. കെ.എസ്.ഇ.ബിയില്‍ വിളിച്ചു പറഞ്ഞെങ്കിലും കുഴപ്പമില്ലെന്നായിരുന്നു അധികൃതരുടെ മറുപടി. എന്നാല്‍ പെട്ടെന്ന് തന്നെ ഉഗ്രശബ്ദത്തോടെ പൊട്ടിത്തെറിച്ച ട്രാൻസ്‌ഫോമർ‌ കത്താൻ തുടങ്ങി. സംഭവമറിഞ്ഞ് അസിസ്റ്റന്റ് എൻജിനിയർ സ്ഥലത്തെത്തിയെങ്കിലും നാട്ടുകാരുടെ പ്രതിഷേധത്തെ തുടർന്ന് തിരിച്ചുപോയി. കെ.എസ്.ഇ.ബി അധികൃതരുടെ ഭാഗത്ത് നിന്നുണ്ടായ അനാസ്ഥയാണ് തീപിടിത്തത്തിന് കാരണമെന്ന് പ്രദേശവാസികള്‍ ആരോപിച്ചു. തീപിടിത്തത്തിന് പിന്നാലെ പ്രദേശത്തെ വൈദ്യുതി വിതരണം തടസപ്പെട്ടു.

ഇവിടേക്കെത്തിയ ഒരു യൂനിറ്റ് ഫയർഫോഴ്സ് തീയണയ്ക്കാനുള്ള ശ്രമം ആരംഭിച്ചുവെങ്കിലും ട്രാൻസ്ഫോമറിന് സമീപം പോലീസ് പിടിച്ചിട്ടിരുന്ന രണ്ടു തൊണ്ടിവാഹനങ്ങളിലേക്ക് തീപടർന്നതോടെ വീണ്ടും അടുത്ത യൂനിറ്റ് ഫയർഫോഴ്സും സ്ഥലത്തെത്തി. തൊണ്ടിവാഹനമായ ഒരു കാർ പൂർണമായും കത്തിനശിച്ചു.