‘
ലാഹോർ: പ്രധാനമന്ത്രി നരേന്ദ്ര മോദിയുടെ മാതൃകയിൽ പാകിസ്താനിൽ വികസനം നടപ്പിലാക്കാനാണ് തന്റെ ശ്രമം എന്ന് വ്യക്തമാക്കി മുൻ പ്രധാനമന്ത്രി നവാസ് ഷെരീഫിന്റെ മകളും പഞ്ചാബ് മുഖ്യമന്ത്രിയും ആയ മറിയം നവാസ്. പ്രധാനമന്ത്രി നരേന്ദ്ര മോദി ഇന്ത്യയിൽ നടപ്പിലാക്കിയ വികസന പദ്ധതികളും അതിലൂടെയുണ്ടായ വികസനവും തനിക്ക് പ്രചോദനം ആണെന്നും മറിയം നവാസ് വ്യക്തമാക്കി.
“പാകിസ്ഥാൻ പുതിയ സാമ്പത്തിക വഴികളും മാതൃകകളും പര്യവേക്ഷണം ചെയ്യേണ്ട സമയമാണിതെന്ന് ഞാൻ വിശ്വസിക്കുന്നു. പ്രധാനമന്ത്രി മോദിയുടെ ഇന്ത്യയിലെ സമീപനം നല്ല ഫലങ്ങൾ ആണ് കാണിച്ചത് , അദ്ദേഹം നടപ്പാക്കിയ സാമ്പത്തിക വികസന തത്വങ്ങളിൽ നിന്ന് ഞാൻ വളരെയധികം പ്രചോദനം ഉൾക്കൊണ്ടിട്ടുണ്ട് . മോദി കാണിച്ചു തന്ന മാതൃകയിൽ പാകിസ്താനിൽ വികസനം നടപ്പിലാക്കാനാണ് ഞാൻ ആഗ്രഹിക്കുന്നത്” മറിയം നവാസ് പത്രസമ്മേളനത്തിൽ പറഞ്ഞു.
പ്രാഥമികമായി , മറിയം നവാസ് ഊന്നൽ നൽകുന്നത് ആഭ്യന്തരവും വിദേശവുമായ നിക്ഷേപത്തെ പ്രോത്സാഹിപ്പിക്കുന്ന ശക്തമായ സാമ്പത്തിക നയമാണ്. മോദിയുടെ ‘മെയ്ക്ക് ഇൻ ഇന്ത്യ’ സംരംഭത്തിൽ നിന്ന് പ്രചോദനം ഉൾക്കൊണ്ട് ബിസിനസ് വളർച്ചയും തൊഴിലവസരങ്ങളും സൃഷ്ടിക്കുന്ന ഒരു അന്തരീക്ഷം സൃഷ്ടിക്കുകയാണ് അവർ ലക്ഷ്യമിടുന്നത്.
അടിസ്ഥാന സൗകര്യ വികസനം മറിയം നവാസിൻ്റെ കാഴ്ചപ്പാടിൻ്റെ മറ്റൊരു ആണിക്കല്ലാണ്. ഇന്ത്യയിലെ കണക്റ്റിവിറ്റിയും അടിസ്ഥാന സൗകര്യങ്ങളും മെച്ചപ്പെടുത്തുന്നതിൽ മോദിയുടെ ശ്രമങ്ങൾക്കും അതിലുള്ള വിജയത്തിനും സമാനമായി, പാക്കിസ്ഥാൻ്റെ ഗതാഗത ശൃംഖലകൾ, ഊർജ അടിസ്ഥാന സൗകര്യങ്ങൾ, സാങ്കേതിക കഴിവുകൾ എന്നിവ മെച്ചപ്പെടുത്താനാണ് മറിയം ലക്ഷ്യമിടുന്നത്. അതെ സമയം തന്നെ ഈ വികസനങ്ങൾ ഒക്കെ നടപ്പിലാക്കുമ്പോൾ തന്നെ സമൂഹത്തിലെ പാർശ്വവത്കരിക്കപ്പെട്ട ജനങ്ങളെ കൈവിടാതെ അവരെയും ഉദ്ദേശിച്ചു കൊണ്ട് മോദി നടപ്പിലാക്കുന്ന പദ്ധതികളുടെയും ആരാധകയാണ് മറിയം നവാസ്.
മറിയം നവാസ് പ്രധാനമന്ത്രി നരേന്ദ്ര മോദിയിൽ നിന്നും പ്രചോദനം ഉൾക്കൊണ്ടത് അത്ര അസ്വാഭാവികമായ കാര്യമല്ലെങ്കിലും ഈ പദ്ധതികൾ എങ്ങനെ വികസിക്കുന്നുവെന്നും പാകിസ്ഥാൻ്റെ സാമൂഹ്യ സാഹചര്യത്തിൽ അവ ചെലുത്തുന്ന സ്വാധീനം എന്താണെന്നതിനും.ഉത്തരം പറയുവാൻ കാലത്തിനു മാത്രമേ കഴിയുകയുള്ളൂ.
