ന്യൂഡൽഹി: ഡൽഹിയിലെ രാം ലാൽ ആനന്ദ് കോളേജിന് ബോംബ് ഭീഷണി. സ്ഫോടനം നടത്തുമെന്ന് ഭീഷണിപ്പെടുത്തി കൊണ്ട് കോളേജ് ജീവനക്കാരനാണ് സന്ദേശം ലഭിച്ചത്. ഇതേ തുടർന്ന് ക്ലാസിലെത്തിയ വിദ്യാർത്ഥികളെ മടക്കി അയച്ചു.
രാവിലെ 10 മണിയോടെയായിരുന്നു ഭീഷണി സന്ദേശം ലഭിച്ചത്. കോളേജിലെ ഓഫീസ് ജീവനക്കാരന് അജ്ഞാത നമ്പറിൽ നിന്നും ഭീഷണിപ്പെടുത്തിക്കൊണ്ടുള്ള ഫോൺ കോൾ എത്തുകയായിരുന്നു. ഇതിന് തൊട്ട് പിന്നാലെ അദ്ദേഹം വിവരം പോലീസിനെ അറിയിച്ചു. തുടർന്ന് അധികൃതർ ക്ലാസിൽ എത്തിയ വിദ്യാർത്ഥികളെ വീടുകളിലേക്ക് പറഞ്ഞയച്ചു.
പിന്നാലെ പോലീസും ബോംബ് സ്ക്വാഡും സ്ഥലത്ത് എത്തി. എന്നാൽ പരിശോധനയിൽ സംശയാസ്പദമായ സാഹചര്യത്തിൽ ഒന്നും കണ്ടെത്താൻ കഴിഞ്ഞില്ല. ഇതേ തുടർന്ന് സന്ദേശം വ്യാജമാണെന്ന നിഗമനത്തിലാണ് അന്വേഷണ സംഘം. സംഭവത്തിൽ നമ്പർ കേന്ദ്രീകരിച്ചുള്ള അന്വേഷണമാണ് നിലവിൽ പുരോഗമിക്കുന്നത്. ഡൽഹി സർവ്വകലാശാലയ്ക്ക് കീഴിലാണ് രാം ലാൽ ആനന്ദ് കോളേജ് പ്രവർത്തിക്കുന്നത്.
Discussion about this post