മുൻകാലങ്ങളിൽ ഒരു സിനിമ കൂടുതൽ ദിവസം തിയേറ്ററുകളിൽ പ്രദർശിപ്പിച്ചു എന്ന് പറയുന്നതായിരുന്നു വിജയം. എന്നാൽ ഇപ്പോൾ ചിത്രം നേടുന്ന കളക്ഷൻ ആണ് പ്രധാനം. പക്ഷേ മലയാള സിനിമയിൽ കോടി ക്ലബ്ബിൽ ഇടം നേടുന്നത് എപ്പോഴും സൂപ്പർതാരങ്ങൾ ആയിരുന്നു. ഇപ്പോഴിതാ മലയാളത്തിന്റെ യുവതലമുറ അത്തരം കാഴ്ച്ചപ്പാടുകൾ തിരുത്തിക്കുറിച്ചിരിക്കുകയാണ്. പ്രേമലുവും മഞ്ഞുമ്മൽ ബോയ്സുമൊക്കെ ഇതിനുദാഹരണങ്ങളാണ്.
2024 ൽ ഇന്ത്യയിൽ ഇതുവരെ റിലീസ് ചെയ്ത സിനിമകളിൽ ഏറ്റവും കൂടുതൽ പണംവാരിയവയുടെ ലിസ്റ്റ് കണ്ട് ഞെട്ടിയിരിക്കുകയാണ് മലയാള സിനിമാലോകം. 15 ചിത്രങ്ങളിൽ അഞ്ചു സിനിമകളും മലയാള സിനിമകളാണെന്നതാണ് ഏവരെയും അത്ഭുതപ്പെടുത്തിയിരിക്കുന്നത്.മാർച്ച് നാല് വരെയുള്ള കണക്കാണിത്.
ലിസ്റ്റിലെ മലയാള ചിത്രങ്ങളിൽ ഒന്നാം സ്ഥാനത്ത് മഞ്ഞുമ്മൽ ബോയ്സാണ്. – 104 കോടിയാണ് ചിത്രത്തിന്റെ കളക്ഷൻ തുകയായി രേഖപ്പെടുത്തിയിരിക്കുന്നത്. ചിത്രം പുറത്തിറങ്ങി 12 ദിവസത്തിനകമാണ് ഈ നേട്ടം കൈവരിച്ചത്. തമിഴ്നാട്ടിലും വൻ പ്രേക്ഷക പിന്തുണയാണ് സിനിമ നേടിയത്. മഞ്ഞുമ്മൽ ബോയ്സിന്റെ തൊട്ടു പിന്നിൽ ഉള്ളത് പ്രേമലുവാണ് – 86.2 കോടിയാണ് ചിത്രത്തിന്റെ കളക്ഷൻ. മലയാളത്തിൽ അടുത്തിടെ ഇറങ്ങിയ വലിയ ഹിറ്റുകളിൽ ഒന്നാണ് പ്രേമലു. വലിയ താരങ്ങൾ ഒന്നും ഇല്ലാതെ എത്തിയ ചിത്രം വലിയ ബോക്സോഫീസ് വിജയമാണ് നേടുന്നത്. ഗിരീഷ് എഡിയാണ് ചിത്രം സംവിധാനം ചെയ്തത്. ചിലപ്പോൾ പ്രേമലു 100 കോടി ബിസിനസ് ഉണ്ടാക്കും എന്നാണ് പുതിയ റിപ്പോർട്ടുകൾ പറയുന്നത്. നസ്ലിൻ നായകനായി എത്തിയ പ്രേമലു മമ്മൂട്ടി, മോഹൻലാൽ ചിത്രങ്ങളെ പിന്നിലാക്കിയേന്നാണ് ട്രേഡ് അനലിസ്റ്റുകൾ പറയുന്നത്.
മമ്മൂട്ടി നായകനായെത്തിയ ഭ്രമയുഗമാണ് അടുത്ത ചിത്രം.- 60 കോടി യാണ് ഈ സിനിമ നേടിയ കളക്ഷൻ. തൊട്ടു പിന്നാലെ 40.53 കോടിയുമായി അബ്രഹാം ഓസ്ലറു0 30 കോടിയുമായി മലൈക്കോട്ടൈ വാലിബനുമുണ്ട്. ഹിന്ദി, തമിഴ്, തെലുങ്ക്, കന്നഡ, മലയാളം തുടങ്ങിയ ഭാഷകളിൽ നിന്നാണ് പതിനഞ്ച് സിനിമകളുടെ ലിസ്റ്റ് പുറത്തുവന്നിരിക്കുന്നത്. ഇതിൽ ഒന്നാം സ്ഥാനത്ത് ബോളിവുഡ് സൂപ്പർതാരം ഹൃത്വിക് റോഷന്റെ ഫൈറ്റർ ആണ്. സൗത്ത് ഇന്ത്യൻ ബോക്സ് ഓഫീസിന്റെ റിപ്പോർട്ട് പ്രകാരം 340 കോടിയാണ് ചിത്രത്തിന്റെ കളക്ഷൻ. രണ്ടാം സ്ഥാനത്ത് ഹനുമാൻ ആണ്. 295 കോടിയാണ് ചിത്രത്തിന്റെ കളക്ഷൻ. 175 കോടിയുമായി മഹേഷ് ബാബു ചിത്രം ഗുണ്ടൂർ കാരം ആണ് മൂന്നാം സ്ഥാനത്ത്.
ലിസ്റ്റിൽ അഞ്ച് മലയാള സിനിമകളാണ് ഇടം പിടിച്ചിരിക്കുന്നത്. അണിയറ പ്രവർത്തകരുടെ റിപ്പോർട്ട് പ്രകാരം അന്വേഷിപ്പിൻ കണ്ടെത്തും 50 കോടി ബിസിനസ് നേടിയിട്ടുണ്ട്. എന്തായാലും 2024 മലയാള സിനിമയ്ക്ക് വലിയ വഴിത്തിരിവാണ് സമ്മാനിച്ചിരിക്കുന്നത് എന്ന് ഉറപ്പാണ്.
Discussion about this post