ന്യൂഡൽഹി: ആദ്യത്തെ എലവേറ്റഡ് ഹൈവേ ആയ ദ്വാരക എക്സ്പ്രസ് വേയുടെ പൂർത്തിയായ ഭാഗം പ്രധാനമന്ത്രി നരേന്ദ്ര മോദി ഇന്ന് രാജ്യത്തിന് സമർപ്പിക്കും. ഹരിയാന സെക്ഷന്റെ ഉദ്ഘാടനം ആണ് പ്രധാനമന്ത്രി നിർവ്വഹിക്കുക. ഇതോടെ ഡൽഹിയിൽ നിന്നും ഗുരുഗ്രാമിലേക്കുള്ള വാഹന യാത്ര എളുപ്പവും സുഗമവുമാകും.
ഗുരുഗ്രാമിലാണ് ഉദ്ഘാടന പരിപാടി. ഇതിനായി പ്രധാനമന്ത്രി ഇന്ന് ഹരിയാനയിൽ എത്തും. 4,100 കോടി രൂപ ചിലവിട്ട് രണ്ട് ഘട്ടങ്ങളാക്കി തിരിച്ചാണ് ഹരിയാന സെക്ഷന്റെ നിർമ്മാണം പൂർത്തിയാക്കിയിരിക്കുന്നത്.
എക്സ്പ്രസ് വേയുടെ 19 കിലോമീറ്റർ ദൂരമാണ് ഹരിയാന സെക്ഷനിൽ ഉള്ളത്. ഇതിൽ ഡൽഹി- ഹരിയാന അതിർത്തിയിൽ നിന്നും ബാസി ആർഒബിയിലേക്കുള്ള 10. 2 കിലോമീറ്റർ ദൂരവും, ബാസി ആർഒബിയിൽ നിന്നും ഖേർകി ദൗലയിലേക്കുള്ള 8.7 കിലോമീറ്റർ ദൂരവും ഉൾപ്പെടുന്നു. ബാക്കിയുള്ള ഭാഗങ്ങളിൽ എക്സ്പ്രസ് വേയുടെ നിർമ്മാണ പ്രവർത്തനങ്ങൾ പുരോഗമിക്കുകയാണ്.
എട്ട് വരികളുള്ള ഹൈ സ്പീഡ് എക്സ്പ്രസ് വേയാണ് ദ്വാരക എക്സ്പ്രസ് വേ. ശിവ മൂർത്തിയിൽ നിന്നും ആരംഭിക്കുന്ന ഖേർകി ദൗള ടോൾപ്ലാസയിലാണ് അവസാനിക്കുക.
Discussion about this post