ന്യൂഡൽഹി: സ്വതന്ത്ര വ്യാപാര കരാറുമായി ബന്ധപ്പെട്ട് ബ്രിട്ടണുമായുള്ള ചർച്ചകൾ നിർത്തിവച്ച് ഇന്ത്യ. പൊതുതിരഞ്ഞെടുപ്പിന്റെ പശ്ചാത്തലത്തിലാണ് ചർച്ചകൾ നിർത്തിവച്ചത്. നിലവിൽ കരാറുമായി ബന്ധപ്പെട്ട ചർച്ചകൾ അവസാന ഘട്ടത്തിലാണ്.
ഇന്ന് വൈകീട്ടോടെ തിരഞ്ഞെടുപ്പ് തിയതികൾ പ്രഖ്യാപിക്കും. ഇതോടെ പെരുമാറ്റ ചട്ടവും നിലവിൽ വരും. പെരുമാറ്റചട്ടം നിലനിൽക്കേ പുതിയ പദ്ധതികൾ നടപ്പിലാക്കുന്നതിനും കരാറുകൾ സംബന്ധിച്ച ചർച്ചകൾക്കുമെല്ലാം വിലക്കുണ്ട്. ഇത് പെരുമാറ്റ ചട്ടലംഘനമാണ്. ഇതേ തുടർന്നാണ് ചർച്ചകൾ നിർത്തിവച്ചത്. തിരഞ്ഞെടുപ്പിൽ ഇതേ സർക്കാർ അധികാരത്തിൽ വന്നാൽ ചർച്ചകൾ തുടരാം. ഇനി മൂന്നാം വട്ട ചർച്ചയാണ് നടക്കാനുള്ളത്.
കരാറുമായി ബന്ധപ്പെട്ട് കഴിഞ്ഞ ആഴ്ച ബ്രിട്ടീഷ് പ്രധാനമന്ത്രി ഋഷി സുനക് പ്രധാനമന്ത്രി നരേന്ദ്ര മോദിയുമായി സംസാരിച്ചിരുന്നു. ഇതിന് പിന്നാലെയാണ് ചർച്ചകൾ നിർത്തിവച്ചത്. തിരഞ്ഞെടുപ്പ് അടുത്ത പശ്ചാത്തലത്തിൽ കഴിഞ്ഞ ആഴ്ച തന്നെ യൂറോപ്യൻ രാജ്യങ്ങളുമായുള്ള കരാറിൽ ഇന്ത്യ ഒപ്പ് വച്ചിരുന്നു.
