ചെന്നൈ : 2024ലെ ഇന്ത്യൻ പ്രീമിയർ ലീഗ് മത്സരങ്ങളിൽ ചെന്നൈ സൂപ്പർ കിംഗ്സിന്റെ ക്യാപ്റ്റൻ ആകാൻ ധോണി ഉണ്ടാവില്ല. മഹേന്ദ്ര സിംഗ് ധോണി ക്യാപ്റ്റൻ സ്ഥാനം ഒഴിഞ്ഞതായി ടീം വ്യക്തമാക്കി. ഋതുരാജ് ഗെയ്ക്വാദ് ആണ് ഈ വർഷത്തെ ഐപിഎൽ മത്സരങ്ങളിൽ ചെന്നൈ സൂപ്പർ കിങ്സിനെ നയിക്കുക. ഒരു യുഗത്തിന്റെ അന്ത്യം എന്നാണ് ചെന്നൈ സൂപ്പർ കിംഗ്സ് ധോണിയുടെ പടിയിറക്കത്തെ വിശേഷിപ്പിച്ചത്.
2008ൽ ആരംഭിച്ച ഇന്ത്യൻ പ്രീമിയർ ലീഗിന്റെ ആദ്യ സീസൺ മുതൽ മഹേന്ദ്ര സിംഗ് ധോണിയാണ് ചെന്നൈ സൂപ്പർ കിംഗ്സിന്റെ ക്യാപ്റ്റൻ ആയിരുന്നത്. 2022 സീസണിൽ തുടക്കത്തിൽ രവീന്ദ്ര ജഡേജ ക്യാപ്റ്റൻ ആക്കിയിരുന്നെങ്കിലും പിന്നീട് ധോണി തന്നെ ക്യാപ്റ്റൻ സ്ഥാനത്ത് തിരിച്ചെത്തി. തമിഴ് ആരാധകരുടെ സ്വന്തം ‘തല’ ആയി 16 വർഷത്തോളം സിഎസ്കെയിൽ തുടർന്ന ശേഷമാണ് ഇപ്പോൾ ധോണി ക്യാപ്റ്റൻ സ്ഥാനത്തു നിന്നും പടിയിറങ്ങുന്നത്.
ഐപിഎല്ലിൽ ഏറ്റവും കൂടുതൽ കിരീടങ്ങൾ സ്വന്തമാക്കാൻ ചെന്നൈ സൂപ്പർ കിംഗ്സിനെ സഹായിച്ചതും മഹേന്ദ്ര സിംഗ് ധോണിയുടെ ക്യാപ്റ്റൻസി ആയിരുന്നു. ഇതുവരെ അഞ്ചു തവണയാണ് ധോണി നായകനായ ചെന്നൈ സൂപ്പർ കിംഗ്സ് ടീം ഐപിഎൽ കപ്പ് ഉയർത്തിയിട്ടുള്ളത്. കഴിഞ്ഞവർഷത്തെ ഐപിഎൽ മത്സരത്തിലും ഫൈനലിൽ ധോണിയുടെ നേതൃത്വത്തിൽ ഗുജറാത്ത് ടൈറ്റൻസിനെ പരാജയപ്പെടുത്തി ചെന്നൈ സൂപ്പർ കിംഗ്സ് വിജയികളായിരുന്നു.
Discussion about this post