ഗുരുഗ്രാം: യൂട്യൂബറും ബിഗ് ബോസ് താരവുമായ എൽവിഷ് യാദവിനെതിരെ വീണ്ടും കേസ്. ചിത്രീകരണത്തിനിടെ പാമ്പുകളെ ഉപയോഗിക്കുകയും അസഭ്യമായ വാക്കുകൾ പ്രയോഗിക്കുകയും ചെയ്ത സംഭവത്തിലാണ് നടപടി. ഈ കേസിൽ അറസ്റ്റുൾപ്പെടെ ഉടൻ ഉണ്ടാകുമെന്നാണ് സൂചന.
32 ബോർ എന്ന പേരുള്ള ഗാനത്തിന്റെ ചിത്രീകരണത്തിനായിരുന്നു പാമ്പുകളെ ഇയാൾ ഉപയോഗിച്ചത്. എൽവിഷ് യാദിന് പുറമേ രാഹുൽ യാദവിനെതിരെയും പോലീസ് കേസ് എടുത്തിട്ടുണ്ട്. ഇന്ത്യൻ ശിക്ഷാ നിയമത്തിലെ 294ാം വകുപ്പ് പ്രകാരം ആണ് നടപടി. ബദാശ്പൂർ പോലീസാണ് കേസ് എടുത്തിട്ടുള്ളത്. സംഭവത്തിൽ പോലീസ് എഫ്ഐആറും രജിസ്റ്റർ ചെയ്തിട്ടുണ്ട്.
ഇന്ത്യൻ ശിക്ഷാ നിയമത്തിന് പുറമേ മൃഗങ്ങൾക്കെതിരായ ക്രൂരകൃത്യങ്ങൾ തടയൽ നിയമത്തിലെയും വന്യജീവി നിയമത്തിലെയും വിവിധ വകുപ്പുകളും ചുമത്തിയിട്ടുണ്ട്. സംഭവത്തിൽ വിശദമായ അന്വേഷണം പുരോഗമിക്കുകയാണ് എന്ന് പോലീസ് അറിയിച്ചു.
നേരത്തെ പാമ്പ് വിഷം വിതരണം ചെയ്തതുമായി ബന്ധപ്പെട്ട കേസിൽ എൽവിഷ് യാദവ് അറസ്റ്റിലായിരുന്നു. ഇതേ തുടർന്ന് ജയിലിൽ ആയ യാദവ് കഴിഞ്ഞ ദിവസമാണ് മോചിതനായത്. ഇതിന് പിന്നാലെയാണ് വീണ്ടും പുതിയ കേസ്.
Discussion about this post