മുംബൈ: കോൺഗ്രസിൽ ഒന്നും രണ്ടുമല്ല അഞ്ച് ഭരണസിരാ കേന്ദ്രങ്ങൾ ഉണ്ടെന്ന് വ്യക്തമാക്കി കഴിഞ്ഞ ദിവസങ്ങളിൽ പാർട്ടി വിട്ട മഹാരാഷ്ട്രയിലെ കോൺഗ്രസ് നേതാവ് സഞ്ജയ് നിരുപം. ഇതിനിടയിൽ കിടന്ന് തന്നെ പോലുള്ള സാധാരണ പ്രവർത്തകർ അനങ്ങാനാകാതെ വിഷമിക്കുകയാണെന്നും അദ്ദേഹം തുറന്നടിച്ചു. പ്രത്യയശാസ്ത്ര പരമായി പാർട്ടിക്ക് ഒരു ദിശാബോധം ഇല്ല എന്ന് പാർട്ടി മുമ്പേ തന്നെ വെളിപ്പെടുത്തിയിരുന്നുവെങ്കിലും ഇപ്പൊ ഒരു സംഘടന എന്ന നിലയിലും പാർട്ടിയിൽ ദിശാബോധമില്ലാതായിരിക്കുകയാണെന്ന് നിരുപം വ്യക്തമാക്കി
അഞ്ച് പേരുടെ കയ്യിലാണ് കോൺഗ്രസിന്റെ ഭരണം ഇപ്പോഴുള്ളത്, ഈ അഞ്ച് പേരാകട്ടെ പരസ്പരം ഗ്രൂപ്പ് ഉണ്ടാക്കി അന്യോന്യം മത്സരിക്കുകയാണെന്നും അദ്ദേഹം തുറന്നു പറഞ്ഞു. സോണിയ ഗാന്ധി, രാഹുൽ ഗാന്ധി, പ്രിയങ്കാ ഗാന്ധി, മല്ലികാർജുൻ ഗാർഖെ എന്നിവരാണ് നാല് പേർ, ഇനി അഞ്ചാമത്തെ ആൾ കോൺഗ്രസ് സംഘടനാ പ്രസിഡന്റ് കെ സി വേണുഗോപാൽ ആണെന്നും നിരുപം വെളിപ്പെടുത്തി.
“നേരത്തെ കോൺഗ്രസിനുള്ളിൽ ഒരു അധികാര കേന്ദ്രം ഉണ്ടായിരുന്നു, ഒരു കൂട്ടം ഉണ്ടായിരുന്നു, മറ്റ് നേതാക്കളെല്ലാം അവർക്കെതിരെ പോരാടാറായിരിന്നു പതിവ് , എന്നാൽ ഇന്ന് കോൺഗ്രസ് പാർട്ടിയിൽ അഞ്ച് അധികാര കേന്ദ്രങ്ങളുണ്ട്, ഇപ്പോൾ അവർ പരസ്പരം പോരടിച്ചു കൊണ്ടിരിക്കുകയാണെന്ന് ഞാൻ പറഞ്ഞാൽ ഒരുപക്ഷെ നിങ്ങൾ അത്ഭുതപ്പെട്ടേക്കാം” മഹാരാഷ്ട്രയിൽ നിന്നുള്ള മുൻ കോൺഗ്രസ് നേതാവ് വ്യക്തമാക്കി.
കഴിഞ്ഞ ദിവസം അദ്ദേഹത്തെ പുറത്താക്കി എന്ന് കോൺഗ്രസ് പാർട്ടി അവകാശപെട്ടുവെങ്കിലും അതിന് മുമ്പ് തന്നെ താൻ രാജി കത്ത് കോൺഗ്രസ് നേതൃത്വത്തിന് നൽകിയിരുന്നു എന്ന് സഞ്ജയ് നിരുപം വെളിപ്പെടുത്തിയിരുന്നു. നേരത്തെ അരവിന്ദ് കെജ്രിവാളിനെതിരെയും ശിവസേന ഉദ്ധവ് ഘടകത്തിനെതിരെയും രൂക്ഷമായ ഭാഷയിൽ വിമർശിച്ചു കൊണ്ട് നിരുപം രംഗത്ത് വന്നിരുന്നു.
Discussion about this post