തിരുവനന്തപുരം : തിങ്കളാഴ്ച തിരുവനന്തപുരത്ത് പോലീസുകാരനെ സംഘം ചേർന്ന് ക്രൂരമായി മർദ്ദിച്ച സംഭവത്തിൽ ഒരാൾ അറസ്റ്റിലായി. ലഹരി മാഫിയ ആണ് പോലീസുകാരനെതിരെ ആക്രമണം നടത്തിയത് എന്നാണ് പോലീസ് കണ്ടെത്തിയിട്ടുള്ളത്. തിങ്കളാഴ്ച രാത്രിയാണ് ഫോർട്ട് പോലീസ് സ്റ്റേഷനിലെ സിജു തോമസ് കൂട്ടം ചേർന്നുള്ള ആക്രമണത്തിന് ഇരയായിരുന്നത്.
തിരുവനന്തപുരം ചാല മാർക്കറ്റിനുള്ളിൽ വച്ചായിരുന്നു ഒരു സംഘം ആളുകൾ ചേർന്ന് പോലീസ് ഓഫീസർ ആയ സിജു തോമസിനെ മർദ്ദിച്ചത്. തിങ്കളാഴ്ച രാത്രി 10 മണിയോടെ ആയിരുന്നു സംഭവം നടന്നത്. പരിക്കേറ്റ സിജു തോമസ് നിലവിൽ ആശുപത്രിയിൽ ചികിത്സയിലാണ്.
തിരുവനന്തപുരം കരിമടൻ കോളനി സ്വദേശിയായ അനൂപിനെയാണ് പോലീസ് അറസ്റ്റ് ചെയ്തിരിക്കുന്നത്. സംഭവത്തിൽ മറ്റ് അഞ്ചുപേർ കൂടി പിടിയിലാകാനുണ്ട്. ഒളിവിൽ പോയിട്ടുള്ള ഇവർക്കായി അന്വേഷണം ആരംഭിച്ചതായി പോലീസ് വ്യക്തമാക്കി.
Discussion about this post