സിംഗപ്പൂർ : ക്യാൻസറിന് കാരണമാകുന്ന രാസവസ്തുക്കളുടെ സാന്നിധ്യം കണ്ടെത്തിയതിനെത്തുടർന്ന് കറി മസാലകൾക്ക് നിയന്ത്രണം ഏർപ്പെടുത്തിയിരിക്കുകയാണ് സിംഗപ്പൂരും ഹോങ്കോങ്ങും. രണ്ട് ഇന്ത്യൻ ബ്രാൻഡുകളിൽ ഉള്ള കറി മസാലകൾക്കാണ് നിയന്ത്രണം ഏർപ്പെടുത്തിയിട്ടുള്ളത്. ഭക്ഷ്യസുരക്ഷാ വിഭാഗം നടത്തിയ പരിശോധനയിൽ അമിതമായ അളവിൽ രാസവസ്തുവിന്റെ സാന്നിധ്യം കണ്ടെത്തിയതിനെ തുടർന്നാണ് നടപടി.
ഇന്ത്യൻ ബ്രാൻഡുകൾ ആയ എംഡിഎച്ച്, എവറസ്റ്റ് എന്നിവയുടെ കറിമസാല ഉൽപ്പന്നങ്ങൾക്കാണ് സിംഗപ്പൂരിലും ഹോങ്കോംഗിലും നിയന്ത്രണമേർപ്പെടുത്തിയിട്ടുള്ളത്. എത്‌ലിൻ ഓക്സൈഡിന്റെ ഉയർന്ന അളവിലുള്ള സാന്നിധ്യമാണ് ഈ ബ്രാൻഡുകളുടെ മസാലകളിൽ കണ്ടെത്തിയിട്ടുള്ളത്. ഈ ബ്രാൻഡുകൾ ഉപയോഗിക്കുന്ന ജനങ്ങൾക്ക് ഇരു സർക്കാരുകളും മുന്നറിയിപ്പ് നൽകിയിട്ടുണ്ട്.
എംഡിഎച്ച് ബ്രാന്റിന്റെ മദ്രാസ് കറി പൗഡർ, സാമ്പാർ പൗഡർ, കറി പൗഡർ എന്നിവയിലെല്ലാം ഉയർന്ന അളവിൽ എത്‌ലിൻ ഓക്സൈഡിന്റെ സാന്നിധ്യം കണ്ടെത്തിയിട്ടുണ്ട്. എവറസ്റ്റ് ബ്രാൻഡിന്റെ ഫിഷ് കറി മസാലയിലാണ് ഉയർന്ന അളവിലുള്ള എത്‌ലിൻ ഓക്സൈഡിന്റെ സാന്നിധ്യം കണ്ടെത്തിയത്. ഹോങ്കോങ്ങിൽ നിന്നും ശേഖരിച്ച് സാമ്പിളുകളിൽ നടത്തിയ പരിശോധനയിൽ ഈ മസാലകളിൽ ഉയർന്ന അളവിൽ കീടനാശിനിയുടെ സാന്നിധ്യവും കണ്ടെത്തിയതായി ഭക്ഷ്യ സുരക്ഷാ വിഭാഗം അറിയിച്ചു.
