കോഴിക്കോട് : പോത്തിന്റെ കുത്തേറ്റ് വയോധികൻ മരിച്ചു. കോഴിക്കോട് മാവൂരിലാണ് സംഭവം. മാവൂർ പനങ്ങോട് കുളങ്ങര വീട്ടിൽ ഹസൈനാർ എന്ന 65 വയസ്സുകാരനാണ് മരിച്ചത്. ഹസൈനാർ വീട്ടിൽ വളർത്തിയിരുന്ന പോത്താണ് ആക്രമണം നടത്തിയത്.
തിങ്കളാഴ്ച വൈകിട്ട് പോത്തിനെ തീറ്റിച്ച ശേഷം തിരികെ വീട്ടിലേക്ക് കൊണ്ടുവരും വഴിയായിരുന്നു പോത്ത് ആക്രമണം നടത്തിയത്. പെട്ടെന്ന് വിരണ്ട പോത്ത് ഹസൈനാരെ കുത്തി പരിക്കേൽപ്പിക്കുകയായിരുന്നു. സമീപവാസികൾ ചേർന്ന് ഉടൻ തന്നെ ഇദ്ദേഹത്തെ ആശുപത്രിയിലേക്ക് കൊണ്ടുപോയി. എന്നാൽ കോഴിക്കോട് മെഡിക്കൽ കോളേജിൽ എത്തിക്കുന്നതിന് മുൻപ് തന്നെ ഹസൈനാർ മരിക്കുകയായിരുന്നു.
അതേസമയം തന്നെ വാൽപ്പാറയിൽ കാട്ടുപോത്തിന്റെ ആക്രമണത്തിൽ ഒരാൾക്ക് പരിക്കേറ്റു. വാൽപ്പാറ അണലി എസ്റ്റേറ്റ് തൊഴിലാളിയായ രവിക്കാണ് പരിക്കേറ്റത്. ഉച്ചയ്ക്ക് ശേഷം എസ്റ്റേറ്റിലെ കാപ്പിത്തോട്ടത്തിൽ വച്ചാണ് രവിക്ക് നേരെ കാട്ടുപോത്തിന്റെ ആക്രമണം ഉണ്ടായത്. പരിക്കേറ്റ രവിയെ വാൽപ്പാറ സർക്കാർ ആശുപത്രിയിൽ പ്രാഥമിക ചികിത്സ നൽകിയശേഷം വിദഗ്ധചികിത്സയ്ക്കായി പൊള്ളാച്ചിയിലേക്ക് കൊണ്ടുപോയി.
