മുംബൈ: ‘ജവാൻ’ സിനിമയിലെ ഗാനത്തിന് ചുവടുവച്ച് സോഷ്യൽ മീഡിയയെ ഇളക്കി മറിച്ച നടൻ മോഹൻ ലാലിനെ പ്രശംസിച്ച് ബോളിവുഡ് നടൻ ഷാരൂഖ് ഖാൻ. ഈ ഗാനത്തെ മോഹൻലാൽ തനിക്ക് ഏറ്റവും പ്രിയപ്പെട്ടതാക്കി മാറ്റിയെന്ന് ഷാരൂഖ് ഖാൻ പറഞ്ഞു. മോഹൻലാലിന്റെ വീഡിയോ കണ്ടതിന് പിന്നാലെ എക്‌സിലൂടെയായിരുന്നു അദ്ദേഹത്തിന്റെ പ്രശംസ.
ജവാൻ സിനിമയിലെ സിന്ദാ ബന്ദ എന്ന ഗാനത്തിന് ആയിരുന്നു മോഹൻലാൽ ചുവടുവച്ചത്. സിന്ദ ബന്ദ ഗാനം തനിക്കിപ്പോൾ ഏറ്റവും പ്രിയപ്പെട്ടതായി മാറിയിരിക്കുന്നുവെന്ന് ഷാരൂഖ് ഖാൻ പറഞ്ഞു. ഇതിന് മോഹൻലാലിനോട് നന്ദി പറയുന്നു. താങ്കൾ ചെയ്തതിന്റെ പകുതി നിലവാരം മാത്രമാണ് തന്റെ നൃത്തചുവടുകൾക്ക് ഉണ്ടായിരുന്നത്. നിങ്ങളോട് ഒരുപാട് സ്‌നേഹം. താങ്കൾ എന്നാണ് തന്റെ വീട്ടിലേക്ക് വിരുന്നുണ്ണാൻ വരുന്നത്. ആ നിമിഷത്തിനായി കാത്തിരിക്കുന്നുവെന്നും ഷാരൂഖ് എക്‌സിൽ കുറിച്ചു.
കൊച്ചിയിൽ സംഘടിപ്പിച്ച ഒരു അവാർഡ് നിശയിൽ ആയിരുന്നു മോഹൻലാൽ സിന്ദ ബന്ദ എന്ന ഗാനത്തിന് ചുവടുവച്ചത്. ഇത് ചിത്രീകരിച്ച ആരാധകർ സോഷ്യൽ മീഡിയോ വഴി പുറത്തുവിടുകയായിരുന്നു. മോഹൻലാലിന്റെ മുഴുവൻ ഫാൻസ് പേജുകളിലും വീഡിയോ പ്രത്യക്ഷപ്പെട്ടു. വൈറലായതോടെ വീഡിയോ ഷാരൂഖിന്റെ ഫാൻസും ഏറ്റെടുക്കുകയായിരുന്നു.
കഴിഞ്ഞ വർഷമാണ് അറ്റ്‌ലിയുടെ സംവിധാനത്തിൽ ഒരുങ്ങിയ ജവാൻ റിലീസ് ചെയ്തത്. ലേഡി സൂപ്പർ സ്റ്റാർ നയൻതാരയാണ് ചിത്രത്തിൽ ഷാരൂഖിന്റെ നായിക. അനിരുദ്ധ രവിചന്ദർ ആണ് സംഗീത സംവിധാനം.
Thank u @Mohanlal sir for making this song the most special for me now. Wish I had done it half as good as you. Love u sir and waiting for dinner at home as and when. You are the OG Zinda Banda!!! https://t.co/0NezClMavx
— Shah Rukh Khan (@iamsrk) April 23, 2024
