ഇറാഖി ടിക് ടോക്ക് താരം ഓം ഫഹദ് വെടിയേറ്റു മരിച്ചു. ബാഗ്ദാദിലെ വീടിന് പുറത്ത് വച്ച് മോട്ടോർ ബൈക്കിലെത്തിയയാൾ വെടിയുതിര്‍ക്കുകയായിരുന്നു. വെള്ളിയാഴ്ച സയൗന ജില്ലയിൽ ആണ്‌ സംഭവം. ഫുഡ് ഡെലിവറി ബോയിയുടെ വേഷത്തില്‍ വന്നാണ് അക്രമി കാറിൽ ഉണ്ടായിരുന്ന ഓം ഫഹദിന് നേരെ വെടിയുതിര്‍ത്തത്. ഇവരുടെ സഹായി നൂർ അൽ സുവൈദിക്ക് വെടിവെപ്പിൽ പരിക്കേറ്റിട്ടുണ്ട്.
സംഭവത്തിന്റെ ദൃശ്യങ്ങള്‍ പുറത്ത് വന്നിട്ടുണ്ട്. ബൈക്കിലെത്തിയ അക്രമി സമീപത്തെ മതിലിനടുത്ത് വാഹനം പാര്‍ക്ക് ചെയ്ത ശേഷം നിര്‍ത്തിയിട്ടിരുന്ന കാറിന് സമീപത്തേക്കു നടക്കുന്നത് കാണാം. കാറിന് ചുറ്റും നടന്ന അക്രമി തിരികെ ബൈക്കിലേക്ക് ഓടിക്കയറുന്നതും ദൃശ്യങ്ങളില്‍ വ്യക്തമാണ്. സംഭവത്തില്‍ പോലീസ് അന്വേഷണം ആരംഭിച്ചിട്ടുണ്ട്.
ഏകദേശം അര ദശലക്ഷം ടിക് ടോക്ക് ഫോളോവേഴ്‌സ് ഉള്ള ഓം ഫഹദ്, ഇറാഖി സംഗീതത്തിൽ നൃത്തം ചെയ്യുന്ന വീഡിയോകൾ പോസ്റ്റ് ചെയ്താണ് പ്രശസ്തയായത്.
കുറച്ച് നാള്‍ മുന്‍പും ഓം ഫഹദ് സോഷ്യൽ മീഡിയയില്‍ വീഡിയോ പങ്കു വച്ചിരുന്നു. പൊതു ധാർമ്മികതയെ ചോദ്യം ചെയ്യുന്ന തരത്തിലുള്ള വീഡിയോകളുടെ പേരിൽ ബാഗ്ദാദിലെ കോടതി കഴിഞ്ഞ വർഷം ആറ് മാസത്തെ തടവിന് യുവതി ശിക്ഷിക്കപ്പെട്ടിരുന്നു.
