സൗദി അറേബ്യയ്ക്കു നേരെ വീണ്ടും ഹൂതികളുടെ ശക്തമായ ആക്രമണം നടന്നു. റിയാദ്, ദമാം, നജ്റാൻ വിമാനത്താവളങ്ങളും ഈസ്റ്റ് – വേസ്റ്റ് പൈപ്പ് ലൈൻ, റാബിഗ് ഓയിൽ റിഫൈനറി, യാമ്പുവിലെ ആരാംകോ എണ്ണക്കമ്പനി തുടങ്ങിയ കേന്ദ്രങ്ങളും ലക്ഷ്യമിട്ടാണ് ആക്രമണം നടത്തിയതെന്ന് ഹൂതികൾ അവകാശപ്പെട്ടു. മേഖലയിൽ സംഘർഷ സാധ്യത വർധിച്ച സാഹചര്യത്തിൽ മിഡിൽ ഈസ്റ്റിലുള്ള അമേരിക്കൻ പൗരന്മാർക്കായി ജാഗ്രതാ നിർദേശം അമേരിക്ക പുതുക്കി നൽകിയിട്ടുണ്ട്.
ദമ്മാം കിംഗ് ഫഹദ് അന്താരാഷ്ട്ര വിമാനത്താവളത്തിലുണ്ടായ ആക്രമണത്തിൽ കൊല്ലപ്പെട്ട ഇന്ത്യൻ പൗരന്റെ മൃതദേഹം എത്രയും വേഗം നാട്ടിലെത്തിക്കാനുള്ള നടപടികൾ വേഗത്തിലാക്കാൻ മുന്നിട്ടിറങ്ങിയിട്ടുണ്ടെന്ന് റിയാദിലെ ഇന്ത്യൻ എംബസി വ്യക്തമാക്കി. പരേതന്റെ കുടുംബവുമായി നിരന്തരം ബന്ധപ്പെട്ടുവരുന്ന എംബസി, ആവശ്യമായ എല്ലാ സഹായങ്ങളും ഉറപ്പുനൽകിയിട്ടുണ്ട്. ഒക്ടോബർ 21-നുണ്ടായ ദമ്മാം വിമാനത്താവള ആക്രമണത്തിലാണ് ഇന്ത്യൻ പൗരന് ജീവൻ നഷ്ടമായത്. വിവിധ ആക്രമണങ്ങളിൽ പരിക്കേറ്റ മറ്റ് ഇന്ത്യക്കാരുടെ നില നിലവിൽ ആശങ്കാജനകമല്ലെന്ന് അധികൃതർ അറിയിച്ചു. കിഴക്കൻ പ്രവിശ്യയിലെ ഷെയ്ബ എണ്ണപ്പാടത്തിന് നേരെയുണ്ടായ ആക്രമണത്തിൽ പരിക്കേറ്റ ഒരു ഇന്ത്യക്കാരനും, മറ്റു രണ്ടു പേരിൽ ഒരാളും ഒക്ടോബർ 22-ന് ആശുപത്രി വിട്ടു.
പരിക്കേറ്റ രണ്ടാമത്തെയാൾ ഉടൻ ഡിസ്ചാർജ് ആകുമെന്നാണ് വിവരം. റിയാദ് വിമാനത്താവള ആക്രമണത്തിൽ പരിക്കേറ്റവരിൽ രണ്ടുപേർ തീവ്രപരിചരണ വിഭാഗത്തിലും രണ്ടുപേർ ജനറൽ വാർഡിലും ചികിത്സയിൽ തുടരുമ്പോൾ ഏഴ് പേർ ഡിസ്ചാർജ് ആയിട്ടുണ്ട്. ഇതേ ആക്രമണത്തിൽ കൊല്ലപ്പെട്ട ഒരു ഇന്ത്യക്കാരന്റെ സംസ്‌കാരം ഒക്ടോബർ 12-ന് റിയാദിൽ വച്ച് നടത്തിയിരുന്നു. പരിക്കേറ്റവർക്ക് വേഗത്തിൽ മികച്ച വൈദ്യസഹായം ലഭ്യമാക്കിയതിന് സൗദി ഭരണകൂടത്തിനും പ്രാദേശിക അധികൃതർക്കും എംബസി നന്ദി രേഖപ്പെടുത്തി. സൗദിയിലെ ഇന്ത്യൻ സമൂഹം അതീവ ജാഗ്രത പാലിക്കണമെന്ന് എംബസി വീണ്ടും മുന്നറിയിപ്പ് നൽകി. വ്യോമാക്രമണ പ്രതിരോധ ദൃശ്യങ്ങളോ, മിസൈൽ ഡ്രോൺ അവശിഷ്ടങ്ങളുടെ ഫോട്ടോകളും വീഡിയോകളും ചിത്രീകരിക്കുന്നതും പ്രചരിപ്പിക്കുന്നതും സൗദി നിയമപ്രകാരം ഗുരുതരമായ കുറ്റകൃത്യമാണ്. പ്രവാസികൾ പ്രാദേശിക നിയമങ്ങൾ കർശനമായി പാലിക്കണമെന്നും മുൻകരുതൽ ഉറപ്പാക്കണമെന്നും എംബസി ഓർമ്മിപ്പിച്ചു.
ഗൾഫ് മേഖലയിലെ സംഘർഷ സാഹചര്യങ്ങൾ മുൻനിർത്തി, പ്രത്യേകിച്ച് സൗദി അറേബ്യയിലുള്ള മലയാളികളുടെ സഹായത്തിനായി മുഖ്യമന്ത്രി വി.ഡി. സതീശന്റെ നിർദ്ദേശപ്രകാരം ഡൽഹിയിലെ കേരള ഹൗസിൽ 24 മണിക്കൂറും പ്രവർത്തിക്കുന്ന കൺട്രോൾ റൂം തുറന്നു. സഹായങ്ങൾക്കായി 011-23747079, 9310443880 (വാട്സ്ആപ്പ്) എന്നീ നമ്പറുകളിൽ ബന്ധപ്പെടാവുന്നതാണ്. നോർക്ക ഡെവലപ്‌മെന്റ് ഓഫീസർ ജെ. ഷാജിമോനെ കൺട്രോൾ റൂം നോഡൽ ഓഫീസറായും, വിദേശകാര്യ മന്ത്രാലയവുമായുള്ള ഏകോപനത്തിനായി അഡീഷണൽ റസിഡന്റ് കമ്മീഷണറുടെ ചുമതലയുള്ള ലെയ്സൺ ഓഫീസർ രാഹുൽ കെ. ജയ്‌സ്വാളിനെയും റസിഡന്റ് കമ്മീഷണർ പുനീത് കുമാർ ചുമതലപ്പെടുത്തിയിട്ടുണ്ട്. റിയാദിലെ ഇന്ത്യൻ എംബസി, ജിദ്ദയിലെ കോൺസുലേറ്റ് ജനറൽ എന്നിവയുമായി ഏകോപനം നടത്തിയാണ് കൺട്രോൾ റൂം പ്രവർത്തിക്കുന്നത്.
