ന്യൂഡൽഹി : കേന്ദ്ര ആഭ്യന്തരമന്ത്രി അമിത് ഷായുടെ എഡിറ്റ് ചെയ്ത വ്യാജ വീഡിയോ സമൂഹമാദ്ധ്യമങ്ങളിൽ പ്രചരിപ്പിച്ച സംഭവത്തിൽ കേസെടുത്ത് ഡൽഹി പോലീസ്. ആഭ്യന്തര മന്ത്രാലയത്തിന്റെ പരാതിയെ തുടർന്നാണ് കേസ് എടുത്തിരിക്കുന്നത്.
ബിജെപി സർക്കാർ വീണ്ടും അധികാരത്തിൽ എത്തിയാൽ ഒബിസി, എസ്സി / എസ്ടി സംവരണം നിർത്തലാക്കുമെന്നായിരുന്നു എഡിറ്റ് ചെയ്ത വീഡിയോ. ഇത് സമൂഹമാദ്ധ്യമങ്ങളിൽ വൈറലാവുകയും ചെയ്തു. ഒരു പ്രത്യേക മതവിഭാഗത്തിന് വേണ്ടിയുള്ള സംവരണം റദ്ദാക്കി ഏകീകൃത സിവിൽ കോഡ് നടപ്പാക്കുമെന്ന അമിത് ഷായുടെ പ്രസ്താവന എഡിറ്റ് ചെയ്താണ് നിലവിൽ പ്രചരിക്കുന്ന വീഡിയോകൾ ഉണ്ടാക്കിയത്.
കോൺഗ്രസ് എഡിറ്റ് ചെയ്ത വീഡിയോ സമൂഹമാദ്ധ്യമങ്ങളിൽ പ്രചരിപ്പിക്കുകയാണ്. ഇത് പൂർണ്ണമായും വ്യാജവും വലിയ തോതിലുള്ള അക്രമത്തിന് സാദ്ധ്യതയുമുണ്ട് എന്ന് ബിജെപി നേതാവ് അമിത് മാളവ്യ പറഞ്ഞു.
പരാതികളെ തുടർന്ന് ഡൽഹി പോലീസ് ഈ എഡിറ്റ് ചെയ്ത വീഡിയോ പോസ്റ്റ് ചെയ്ത അക്കൗണ്ടിനെക്കുറിച്ചുള്ള വിവരങ്ങൾ തേടി എക്സിനും ഫേസ്ബുക്കിനും കത്തയച്ചു. ഉടൻ പ്രതികളെ കണ്ടെത്തി അറസ്റ്റ് ചെയ്യാനുള്ള നടപടിയുണ്ടാകുമെന്നും ഡൽഹി സൈബർ പോലീസ് അറിയിച്ചു.
