കോഴിക്കോട് : സൂര്യാഘാതത്തെ തുടർന്ന് സംസ്ഥാനത്ത് ഒരാൾ കൂടി കുഴഞ്ഞ് വീണ് മരിച്ചു. പന്നിയങ്കര സ്വദേശി വിജേഷ് (40) ആണ് മരിച്ചത്. കോഴിക്കോടാണ് സംഭവം. ആശുപത്രിയിൽ ചികിത്സയിൽ കഴിയവേ മരണം സംഭവിക്കുകയായിരുന്നു.
ശനിയാഴ്ചയാണ് വിജേഷിന് സൂര്യാഘാതം ഏറ്റത്. ജോലിസ്ഥലത്ത് വച്ച് സൂര്യാഘാതം ഏറ്റ് കുഴഞ്ഞു വീഴുകയായിരുന്നു. ഉടൻതന്നെ കോഴിക്കോട് ബീച്ച് ആശുപത്രിയിൽ എത്തിച്ചു. എന്നാൽ ആരോഗ്യസ്ഥിതി മോശമായതോടെ വിദഗ്ധ ചികിത്സയ്ക്കായി കാസർകോട് മെഡിക്കൽ കോളേജ് ആശൂപത്രിയിലേക്ക് പ്രവേശിപ്പിച്ചിരിക്കുകയായിരുന്നു.
അതേസമയം കേരളത്തിൽ വേനൽ കടുക്കും എന്നാണ് അധികൃതർ അറിയിച്ചിരിക്കുന്നത്. അതിനാൽ ചൂട് കൂടുന്ന മണിക്കൂറുകളിൽ കഴിയുന്നതും പുറത്ത് അധികസമയം ചിലവിടുകയോ, ജോലി ചെയ്യുകയോ അരുത്. കൂടാതെ ഇടയ്ക്കിടെ പരമാവധി ശുദ്ധജലം കുടിക്കുക. ദാഹമില്ലെങ്കിലും വെള്ളം കുടിക്കുന്നത് തുടരുക.
