തിരുവനന്തപുരം: കള്ളക്കടൽ പ്രതിഭാസത്തെ തുടർന്ന് കേരള തീരത്ത് കടലാക്രമണം. തിരുവനന്തപുരം അഞ്ച് തെങ്ങിന് സമീപമാണ് ശക്തമായ കടലാക്രമണം ഉണ്ടായത്. ഇതേ തുടർന്ന് തീരമേഖലയിൽ താമസിക്കുന്നവരെ സുരക്ഷിത സ്ഥാനങ്ങളിലേക്ക് മാറ്റി.
ഇന്നലെ രാത്രിയോടെയായിരുന്നു സംഭവം. ശക്തമായ തിരമാല റോഡിലേക്ക് കയറി. തിരമാല കൂടുതൽ ശക്തമാകാനുള്ള സാദ്ധ്യതയെ തുടർന്നായിരുന്നു തീരമേഖലകളിൽ ഉള്ളവരെ ഒഴിപ്പിച്ചത്. മൂന്ന് വീടുകളിൽ ഉള്ളവരെയാണ് മാറ്റിപ്പാർപ്പിച്ചത് എന്ന് അധികൃതർ അറിയിച്ചു.
കള്ളക്കടൽ പ്രതിഭാസത്തിന് സാദ്ധ്യതയുള്ളതിനാൽ കേരള തീരത്ത് ജാഗ്രത പാലിക്കണമെന്ന് അധികൃതർ ഇന്നലെ മുന്നറിയിപ്പ് നൽകിയിരുന്നു. കടലാക്രമണ സാദ്ധ്യതയുള്ളതിനാൽ കേരള തീരത്ത് ഓറഞ്ച് അലർട്ട് ഏർപ്പെടുത്തുകയും ചെയ്തിരുന്നു. രാത്രിയോടെ കടലാക്രമണം ഉണ്ടാകുമെന്ന് അധികൃതർ മുന്നറിയിപ്പ് പുറപ്പെടുവിച്ചതിന് തൊട്ട് പിന്നാലെയാണ് അഞ്ച് തെങ്ങിൽ ഉയർന്ന തിരമാലകൾ റോഡിലേക്ക് അടിച്ചത്.
അതേസമയം ഇന്നും വരും ദിവസങ്ങളിലും കടലാക്രമണം ഉണ്ടാകുമെന്നാണ് ദേശീയ സമുദ്ര സ്ഥിതി പഠന ഗവേഷണ കേന്ദ്രത്തിന്റെ മുന്നറിയിപ്പ്. ഇതേ തുടർന്ന് കേരള തീരത്ത് ഏർപ്പെടുത്തിയ ഓറഞ്ച് അലർട്ട് തുടരുകയാണ്. കടൽക്ഷോഭം രൂക്ഷമാകാൻ സാധ്യതയുള്ളതിനാൽ അപകട മേഖലകളിൽ നിന്ന് അധികൃതരുടെ നിർദേശാനുസരണം മാറി താമസിക്കണമെന്ന് അധികൃതർ അറിയിച്ചു. മത്സ്യബന്ധന യാനങ്ങൾ (ബോട്ട്, വള്ളം, മുതലായവ) ഹാർബറിൽ സുരക്ഷിതമായി കെട്ടിയിട്ട് സൂക്ഷിക്കുക. വള്ളങ്ങൾ തമ്മിൽ സുരക്ഷിത അകലം പാലിക്കുന്നത് കൂട്ടിയിടിച്ചുള്ള അപകട സാദ്ധ്യത ഒഴിവാക്കാം. മത്സ്യബന്ധന ഉപകരണങ്ങളുടെ സുരക്ഷ ഉറപ്പാക്കണം.ബീച്ചിലേക്കുള്ള യാത്രകളും കടലിൽ ഇറങ്ങിയുള്ള വിനോദങ്ങളും ഒഴിവാക്കണമെന്നും അധികൃതർ വ്യക്തമാക്കി.
Discussion about this post