ന്യൂഡൽഹി : നടനും എംപിയും ആയ മനോജ് തിവാരിയുടെ മകൾ റിതി തിവാരി ബിജെപിയിൽ ചേർന്നു. ഗായികയും ഗാനരചയിതാവും ആണ് റിതി തിവാരി. പിതാവിന്റെ പാത പിന്തുടർന്ന് രാഷ്ട്രീയത്തിലേക്ക് പ്രവേശിക്കുന്നത് ദൈവനിയോഗം ആണെന്ന് റിതി തിവാരി വ്യക്തമാക്കി. ബിജെപി ദേശീയ അധ്യക്ഷൻ ജെപി നദ്ദ ആവശ്യപ്പെട്ട പ്രകാരമാണ് രാഷ്ട്രീയ പ്രവേശനം നേരത്തെ തന്നെ നടത്തിയതെന്നും റിതി അഭിപ്രായപ്പെട്ടു.
ഭോജ്പുരി ചലച്ചിത്ര താരവും എംപിയുമായ മനോജ് തിവാരിയുടെയും റാണി തിവാരിയുടെയും മകളാണ് റിതി. 2009ൽ സമാജ് വാദി പാർട്ടിയിലൂടെ ആയിരുന്നു മനോജ് തിവാരി രാഷ്ട്രീയ രംഗത്തേക്ക് പ്രവേശിച്ചിരുന്നത്. പിന്നീട് 2014 ൽ അദ്ദേഹം ബിജെപിയിൽ ചേരുകയായിരുന്നു. 2014 ൽ നോർത്ത് ഈസ്റ്റ് ഡൽഹി നിയോജകമണ്ഡലത്തിൽ നിന്നും ആം ആദ്മി പാർട്ടി സ്ഥാനാർത്ഥി ആനന്ദകുമാറിനെ പരാജയപ്പെടുത്തിയാണ് മനോജ് വാരി ലോക്സഭയിലേക്ക് തിരഞ്ഞെടുക്കപ്പെട്ടിരുന്നത്.
മുൻ ഡൽഹി മുഖ്യമന്ത്രി ഷീലാ ദീക്ഷിതിനെ 3.66 ലക്ഷം വോട്ടിന്റെ ഭൂരിപക്ഷത്തിൽ പരാജയപ്പെടുത്തിക്കൊണ്ടാണ് ഡൽഹിയിൽ മനോജ് തിവാരി ആധിപത്യം ഉറപ്പിക്കുന്നത്. ഈ വർഷം കോൺഗ്രസ് സ്ഥാനാർഥി കനയ്യ കുമാർ ആണ് മനോജ് തിവാരിക്കെതിരെ മത്സരിക്കുന്നത്. മെയ് 25നാണ് ഡൽഹിയിൽ ലോക്സഭ തിരഞ്ഞെടുപ്പ് നടക്കുന്നത്.
