ന്യൂഡൽഹി : ഓരോ ചുവടുവെപ്പിലൂടെ രാജ്യത്തെ ഞെട്ടിച്ചു കൊണ്ടിരിക്കുകയാണ് ഐഎസ്ആർഒ. ചന്ദ്രയാൻ-4 ചന്ദ്രനിൽ ഇറങ്ങുന്ന സ്ഥലം വെളിപ്പെടുത്തിയിരിക്കുകയാണ്. ചന്ദ്രോപരിതലത്തിലെ ശിവശക്തി പോയിന്റിന് സമീപം ഇറക്കുമെന്ന് സ്‌പേസ് ആപ്ലിക്കേഷൻ സെന്റർ (എസ്എസി) ഡയറക്ടർ നിലേഷ് ദേശായി പറഞ്ഞു . ഭാവി ചാന്ദ്ര പര്യവേക്ഷണ പദ്ധതികളെക്കുറിച്ച് ദേശായി അടുത്തിടെ നടത്തിയ അവതരണത്തിലാണ് വിവരങ്ങൾ വെളിപ്പെടുത്തിയത്.
ചന്ദ്രനിലെ പാറകളും മണ്ണും ഇന്ത്യയിലേക്ക് തിരികെ കൊണ്ടുവരാൻ ലക്ഷ്യമിട്ടുള്ളതാണ് ഇന്ത്യയുടെ അതിമോഹമായ ചന്ദ്രയാൻ -4 ദൗത്യം ..ചന്ദ്രയാൻ-3 ന്റെ വിക്രം ലാൻഡറിന്റെ ടച്ച്ഡൗണിന്റെ സ്ഥാനമായ ശിവശക്തി പോയിന്റിന് സമീപം ചന്ദ്രയാൻ 4 ഇറക്കും. ഇവിടെ ലാൻഡ് ചെയ്യുന്നതിലൂടെ, ശാസ്ത്രീയമായി മൂല്യമുള്ള പ്രദേശങ്ങളിൽ നിന്നുള്ള സാമ്പിളുകൾ പഠിക്കാനും വീണ്ടെടുക്കാനും ചന്ദ്രയാൻ -4 ന് അവസരം ലഭിക്കും.
എന്നാൽ ദൗത്യത്തിന് ഒരു ചാന്ദ്ര ദിനത്തിന്റെ പ്രവർത്തന ആയുസ്സ് ഉണ്ടായിരിക്കുകയോള്ളൂ എന്ന് ദേശായി പറഞ്ഞു , അതായത് ഏകദേശം 14 ഭൗമദിനങ്ങൾ. അതേസമയം ചന്ദ്രനിലെ തീവ്രമായ താപനില വ്യതിയാനങ്ങളും സൂര്യപ്രകാശത്തിന്റെ അഭാവവും ദീർഘകാല പ്രവർത്തനങ്ങൾക്ക് കാര്യമായ വെല്ലുവിളികൾ ഉയർത്തുന്നു. ചന്ദ്രയാൻ-4 ദൗത്യത്തിനായി വ്യത്യസ്ത പേലോഡുകൾ വഹിക്കുന്നതിനായി രണ്ട് വ്യത്യസ്ത റോക്കറ്റുകൾ – ഹെവി-ലിഫ്റ്റ് എൽവിഎം -3, വർക്ക്‌ഹോഴ്‌സ് പിഎസ്എൽവി എന്നിവ വിക്ഷേപിക്കാനും ഐഎസ്ആർഒ പദ്ധതിയിടുന്നു .
ചന്ദ്രയാൻ-4 അഞ്ച് ബഹിരാകാശവാഹന മൊഡ്യൂളുകൾ ഉൾക്കൊള്ളുന്നതാണ് . ഒരു പ്രൊപ്പൽഷൻ മൊഡ്യൂൾ, ലാൻഡിംഗിനുള്ള ഒരു ഡിസെൻഡർ മൊഡ്യൂൾ, ചന്ദ്രോപരിതലത്തിൽ നിന്ന് ഉയർത്താനുള്ള ഒരു അസെൻഡർ മൊഡ്യൂൾ, മടക്കയാത്രയിൽ നാവിഗേറ്റ് ചെയ്യുന്നതിനുള്ള ഒരു ട്രാൻസ്ഫർ മൊഡ്യൂൾ, സുരക്ഷിതമായി ഭൂമിയിലേക്കുള്ള ചാന്ദ്ര സാമ്പിളുകൾ എത്തിക്കുന്നതിനുള്ള റീ-എൻട്രി മൊഡ്യൂൾ .
ചന്ദ്രന്റെ സാമ്പിളുകൾ ശേഖരിച്ച് വിശദമായ ശാസ്ത്രീയ വിശകലനത്തിനായി ഭൂമിയിലേക്ക് തിരികെ കൊണ്ടുവരിക എന്ന ദൗത്യം വിജയിച്ചാൽ അമേരിക്ക, റഷ്യ, ചൈന എന്നിവയ്ക്ക് ശേഷം ഈ നേട്ടം കൈവരിക്കുന്ന നാലാമത്തെ രാജ്യമായി ഇന്ത്യ മാറും.
Discussion about this post