മഴക്കാലത്തെ ഉയർന്ന ഈർപ്പവും ഈർപ്പമുള്ള അന്തരീക്ഷവും കാരണം വളർത്തുമൃഗങ്ങളിൽ (പ്രത്യേകിച്ച് നായ്ക്കളിലും പൂച്ചകളിലും) ഫംഗസ് അണുബാധ, ചെള്ളുകളുടെ ശല്യം , നെഞ്ചിലെ ചുമ ,എന്നിവ വളരെ വേഗത്തിൽ വർദ്ധിച്ചുവരുന്നതായി വെറ്ററിനറി ഡോക്ടർമാർ മുന്നറിയിപ്പ് നൽകുന്നു.
ഫംഗസ് അണുബാധയും ചർമ്മ രോഗങ്ങളും
മഴയിൽ നനയുന്ന മൃഗങ്ങളുടെ രോമങ്ങൾക്കിടയിൽ ഈർപ്പം തങ്ങിനിൽക്കുന്നത് ഫംഗസ് വളരാൻ ഇടയാക്കുന്നു.
ഇതിന്റെ ഫലമായി കടുത്ത ചൊറിച്ചിൽ, ചർമ്മം ചുവന്നു തടുക്കൽ, രോമം കൊഴിച്ചിൽ, ദുർഗന്ധം എന്നിവയുണ്ടാകുന്നു.
വലിയ രോമങ്ങളുള്ള നായ്ക്കൾ ഒപ്പം പേർഷ്യൻ പൂച്ചകൾ എന്നിവയിലാണ് ഇത് കൂടുതൽ കാണപ്പെടുന്നത്.
ചെള്ളുകളുടെ വർദ്ധനവ്
മഴക്കാലത്ത് ചെള്ളുകൾ പെരുകുന്നത് മൃഗങ്ങളിൽ കടുത്ത അലർജിക്കും ‘ടിക് ഫീവർ’ പോലുള്ള അസുഖങ്ങൾക്കും കാരണമാകുന്നു.
ശ്വാസകോശ അണുബാധയും ചുമയും
ചെറിയ ഇനം നായ്ക്കളുടെ അടിവയറ്റിലും കാലുകളിലും മഴവെള്ളവും ചെളിയും പറ്റിപ്പിടിച്ചിരിക്കുന്നത് വഴി അവയ്ക്ക് പെട്ടെന്ന് തണുപ്പടിക്കുകയും നെഞ്ചിൽ അണുബാധയും ചുമയും ഉണ്ടാവുകയും ചെയ്യുന്നു.
വളർത്തുമൃഗ ഉടമകൾ ശ്രദ്ധിക്കേണ്ട കരുതൽ നടപടികൾ:
പുറത്തു കൊണ്ടുപോയി കൊണ്ടുവന്ന ശേഷവും മഴയിൽ നനഞ്ഞ ശേഷവും വളർത്തുമൃഗങ്ങളുടെ രോമങ്ങളും അടിവയറും കാലുകളും തുണി ഉപയോഗിച്ച് നന്നായി തുടച്ച് ഉണക്കണം. മഴയുള്ള സമയത്ത് പുറത്തിറക്കുമ്പോൾ പെറ്റ് റെയിൻ കോട്ടുകൾ ഉപയോഗിക്കുന്നത് നനയുന്നത് തടയാൻ സഹായിക്കും.
നടത്തത്തിന് ശേഷം മൃഗങ്ങളുടെ പാദങ്ങൾ കഴുകി വൃത്തിയാക്കി ഉണക്കി സൂക്ഷിക്കുക. വെറ്ററിനറി ഡോക്ടറുടെ നിർദ്ദേശപ്രകാരം ആന്റിഫംഗൽ ഷാമ്പൂകളും പൗഡറുകളും ഉപയോഗിക്കുക. കടുത്ത ചൊറിച്ചിലോ ചുവന്ന തടുപ്പുകളോ കണ്ടാൽ ഉടൻ തന്നെ ഡോക്ടറെ കാണിച്ച് ചികിത്സ തേടുക.
