എറണാകുളം : പകർപ്പാവകാശ നിയമം ലംഘിച്ചതായി ചൂണ്ടിക്കാട്ടി മഞ്ഞുമ്മൽ ബോയ്സ് സിനിമയുടെ നിർമ്മാതാക്കൾക്കെതിരെ സംഗീതസംവിധായകൻ ഇളയരാജ. സിനിമയിൽ ‘കണ്മണി അൻപോട്’ എന്ന ഗാനം ഉൾപ്പെടുത്തിയതിനെതിരെയാണ് ഇളയരാജ വക്കീൽ നോട്ടീസ് അയച്ചിരിക്കുന്നത്. തന്റെ അനുവാദമില്ലാതെയാണ് ഗാനം സിനിമയിൽ ഉൾപ്പെടുത്തിയിരിക്കുന്നത് എന്നാണ് ഇളയരാജ വ്യക്തമാക്കുന്നത്.
മലയാള സിനിമ ബോക്സ് ഓഫീസിലെ എക്കാലത്തെയും വമ്പൻ പണം വാരിപ്പടമായിരുന്നു മഞ്ഞുമ്മൽ ബോയ്സ്. കേരളത്തിൽ കൂടാതെ തമിഴ്നാട്ടിലും വൻ സ്വീകാര്യത ആയിരുന്നു ചിത്രത്തിന് ലഭിച്ചിരുന്നത്. കമലഹാസൻ ചിത്രമായ ഗുണയിലെ കണ്മണി അൻപോട് എന്ന ഗാനം ചിത്രത്തിന്റെ പ്രധാന ശ്രദ്ധാകേന്ദ്രമായിരുന്നു.
ചിത്രത്തിന്റെ ടൈറ്റിൽ കാർഡിൽ ഈ ഗാനത്തിനും ഇളയരാജയ്ക്കും പ്രത്യേക പരാമർശം നൽകിയായിരുന്നു ഗാനം ചിത്രത്തിൽ ഉൾപ്പെടുത്തിയിരുന്നത്. എന്നാൽ ഗാനം സിനിമയിൽ ഉൾപ്പെടുത്താനായി തന്റെ അനുമതി വാങ്ങിയിരുന്നില്ല എന്നാണ് ഇളയരാജ വ്യക്തമാക്കുന്നത്. 15 ദിവസത്തിനകം നഷ്ടപരിഹാരം നൽകണമെന്ന് ആവശ്യപ്പെട്ടാണ് ഇളയരാജ വക്കീൽ നോട്ടീസ് അയച്ചിരിക്കുന്നത്.
Discussion about this post