മണ്ണിൽ പൊതിഞ്ഞ് 100 നാൾ ; ആ വൈറൽ വീഡിയോയ്ക്ക് പിന്നിൽ വലിയൊരു കഥയുണ്ട് ; ആരെയും അമ്പരപ്പിക്കുന്ന ഹിംബ ഗോത്രത്തിലെ വിവാഹ ചടങ്ങുകൾ

ഈയിടെയായി സമൂഹമാദ്ധ്യമങ്ങളിൽ ഏറെ വൈറലായ ഒരു വീഡിയോ ആണ് ഒരു ആഫ്രിക്കൻ സ്ത്രീ മണ്ണിൽ പൊതിഞ്ഞിരിക്കുന്ന ദൃശ്യങ്ങൾ. എന്നാൽ ഇത് വെറും ഒരു വീഡിയോ അല്ല, ആഫ്രിക്കയിലെ ഒരു ഗോത്ര വിഭാഗത്തിന്റെ കല്യാണ ചടങ്ങുകളുമായി ബന്ധപ്പെട്ടുള്ള ദൃശ്യങ്ങളാണ് ആ വീഡിയോയിലൂടെ നമ്മൾ കണ്ടിരുന്നത്. വനവാസികളായ ഗോത്ര വിഭാഗങ്ങൾക്ക് ഓരോ പ്രദേശത്തിനും ഗോത്രത്തിനും അനുസരിച്ച് വ്യത്യസ്തമായ ജീവിത രീതികളും ആചാരങ്ങളും എല്ലാം ഉണ്ടാകും എന്ന് നമുക്കറിയാം. എന്നാൽ നമീബിയയിലെ ഹിംബ ഗോത്രത്തിലെ വിവാഹ ആചാരങ്ങൾ ആരുടെയും കണ്ണ് തള്ളിക്കുന്നതാണ്.

വിവാഹത്തിനു മുൻപ് 100 നാൾ വധുവിനെ മണ്ണിൽ പൊതിഞ്ഞ് സൂക്ഷിക്കുന്ന ആചാരത്തിന്റെ പേരിൽ പ്രശസ്തമാണ് ഹിംബാ ഗോത്രം. ആഫ്രിക്കയുടെ തെക്ക് ഭാഗത്ത് സ്ഥിതി ചെയ്യുന്ന ഒരു രാജ്യമാണ് നമീബിയ. ഇന്നും നിരവധി ഗോത്രങ്ങൾ നൂറ്റാണ്ടുകൾക്ക് മുമ്പ് ജീവിച്ചിരുന്ന അതേ രീതിയിൽ ഈ രാജ്യത്തെ വനങ്ങളിൽ ജീവിക്കുന്നു. ഹിംബ ഗോത്രത്തിലെ ആളുകൾ പ്രധാനമായും കർഷകരാണ്. നൂറ്റാണ്ടുകളായി വനപ്രദേശങ്ങളിൽ കൃഷി ചെയ്തും വളർത്തുമൃഗങ്ങളെ പരിപാലിച്ചും ഉൾവനങ്ങളിൽ വേട്ടയാടിയുമെല്ലാമാണ് ഹിംബ ഗോത്രം ജീവിക്കുന്നത്. പശു, ചെമ്മരിയാട്, ആട് എന്നിവയെ വളർത്തുന്നതാണ് ഇവരുടെ പ്രധാന ഉപജീവനമാർഗ്ഗം. പുരുഷന്മാർ വനപ്രദേശങ്ങളിൽ കന്നുകാലി വളർത്തലും വേട്ടയാടലും ഒക്കെയായി കഴിയുമ്പോൾ സ്ത്രീകൾ കുടുംബത്തിന്റെ സംരക്ഷണം ഏറ്റെടുത്ത് വീടുകളിൽ തന്നെ കഴിയുന്നവരാണ്.

ഹിംബ ഗോത്രത്തിൽ പെൺകുട്ടികൾ വളരെ ചെറുപ്രായത്തിൽ തന്നെ വിവാഹിതരാകുന്നവരാണ് . ഇവിടെ ഒരു പുരുഷന് ഒന്നിലധികം തവണ വിവാഹം കഴിക്കാൻ അനുവാദമുണ്ട്. വിവാഹ ചടങ്ങുകളുടെയും ആചാരങ്ങളുടെയും കാര്യത്തിൽ ഏറെ വ്യത്യസ്തത പുലർത്തുന്ന ഒരു ഗോത്രമാണ് ഹിംബ. വിവാഹദിവസം മാത്രമേ ഈ ഗോത്രത്തിലെ സ്ത്രീകൾ വെള്ളത്തിൽ കുളിക്കാറുള്ളൂ എന്നാണ് പറയപ്പെടുന്നത്. വിവാഹത്തിനുമുൻപായി ദേഹം മണ്ണിൽ പൊതിഞ്ഞ ശേഷം വധുവാകുന്ന പെൺകുട്ടിയെ 100 ദിവസം അടച്ചിട്ട മുറിയിൽ സൂക്ഷിക്കുന്നതും ഹിംബാ ഗോത്രത്തിന്റെ ആചാരമാണ്. ചുവന്ന മണ്ണിനോടൊപ്പം മൃഗക്കൊഴുപ്പ് കലർത്തി വധൂവരന്മാർക്ക് ശരീരത്തിൽ തേച്ചു കൊടുക്കുന്നതാണ് ഹിംബകളുടെ ആചാരം. ഇങ്ങനെ ചെയ്യുന്നത് ചൂടിൽ നിന്നും അണുബാധകളിൽ നിന്നും ശരീരത്തെ സംരക്ഷിക്കും എന്നാണ് അവർ കരുതുന്നത്.

വിവാഹം കഴിക്കാൻ ആഗ്രഹിക്കുന്ന പെൺകുട്ടിയെ തട്ടിക്കൊണ്ടുവന്ന് നൂറുദിവസം തടവിൽ പാർപ്പിക്കണം എന്നാണ് ഹിംബ ഗോത്രത്തിലെ ഒരു പ്രധാന ആചാരം. ഈ 100 ദിവസത്തിനു ശേഷം ആയിരിക്കും വിവാഹം നടത്തുക. വിവാഹത്തിനു മുന്നോടിയായി വധുവിന് വിലയേറിയ വസ്ത്രങ്ങളും ആഭരണങ്ങളും എല്ലാം സമ്മാനമായി നൽകുകയും ചെയ്യാറുണ്ട്. കൂടാതെ വിവാഹദിനത്തിൽ അതിഥികളിലെ ഏറ്റവും പ്രധാനപ്പെട്ട ഒരു വ്യക്തിക്കൊപ്പം ഈ വധു കിടക്ക പങ്കിടേണ്ടതായും ഉണ്ട്. അസൂയ ഇല്ലാതാക്കാനാണ് ഇങ്ങനെ ചെയ്യുന്നത് എന്നാണ് ഹിംബകളുടെ വാദം. ഹിംബ ഗോത്രത്തിലെ പുരുഷന്മാർക്ക് എത്ര വിവാഹം വേണമെങ്കിലും ചെയ്യാൻ അനുവാദം ഉണ്ട്. എന്നാൽ സ്ത്രീകൾക്ക് ഒരു വിവാഹത്തിന് മാത്രമാണ് അനുമതി ഉള്ളത്. ഇത്തരത്തിലുള്ള വ്യത്യസ്ത ആചാരങ്ങളുടെ പേരിൽ നമീബിയയിൽ തന്നെ ഏറെ ശ്രദ്ധേയമായ ഗോത്രമാണ് ഹിംബ ഗോത്രം.