ഭുവനേശ്വർ : ഒഡീഷയിലെ ആദ്യത്തെ ബിജെപി സർക്കാർ ജൂൺ 12 ബുധനാഴ്ച സത്യപ്രതിജ്ഞ ചെയ്ത് അധികാരമേൽക്കും. മോഹൻ ചരൺ മാജി ആണ് ഒഡീഷയുടെ മുഖ്യമന്ത്രിയാകുന്നത്. പ്രധാനമന്ത്രി നരേന്ദ്രമോദി അടക്കമുള്ള പ്രമുഖർ ഒഡീഷയിലെ പുതിയ സർക്കാരിന്റെ സത്യപ്രതിജ്ഞ ചടങ്ങിൽ പങ്കെടുക്കും. ഒഡീഷയിൽ 24 വർഷമായി ഭരണം നടത്തിയിരുന്ന നവീൻ പട്നായിക്കിന്റെ ബിജെഡിക്കെതിരെ അട്ടിമറി വിജയമായിരുന്നു തിരഞ്ഞെടുപ്പിൽ ബിജെപി നേടിയിരുന്നത്.
ചൊവ്വാഴ്ച ഒഡീഷയിൽ ചേർന്ന ബിജെപി നിയമസഭാ കക്ഷി യോഗത്തിലാണ് മുഖ്യമന്ത്രിയുമായി ബന്ധപ്പെട്ട് തീരുമാനം ഉണ്ടായത്. മുതിർന്ന ബിജെപി നേതാക്കളും കേന്ദ്ര മന്ത്രിമാരും ആയ രാജ്നാഥ് സിംഗ്, ഭൂപേന്ദ്ര യാദവ് എന്നിവർ ഒഡീഷയിലെ എംഎൽഎമാരുമായി നടത്തിയ ചർച്ചകൾക്കൊടുവിലാണ് പുതിയ സർക്കാരിലെ മന്ത്രിമാരെയും മുഖ്യമന്ത്രിയെയും തീരുമാനിച്ചത്.
മുഖ്യമന്ത്രിയെ കൂടാതെ 2 ഉപമുഖ്യമന്ത്രിമാരും ഒഡീഷ സർക്കാരിൽ ഉണ്ടാകും . കെ വി സിംഗ് ദിയോ, പ്രവതി പരിത എന്നിവരെയാണ് ഉപ മുഖ്യമന്ത്രിമാരായി തിരഞ്ഞെടുത്തിട്ടുള്ളത്. ബിജെപി സർക്കാർ സംസ്ഥാനത്ത് ആദ്യമായാണ് അധികാരത്തിൽ എത്തുന്നത് എങ്കിലും നേരത്തെ മൂന്ന് തവണ എംഎൽഎ ആയിട്ടുള്ള വ്യക്തിയാണ് മുഖ്യമന്ത്രിയാകുന്ന മോഹൻ ചരൺ മാജി. സംസ്ഥാന നിയമസഭയിലേക്കുള്ള 147 സീറ്റിൽ 79 സീറ്റുകളും സ്വന്തമാക്കിയാണ് ബിജെപി ഒഡീഷയുടെ ഭരണം പിടിച്ചെടുത്തത്.
