ഞങ്ങൾ ശരീരം കൊണ്ട് ചെറുതായിരിക്കാം…. എന്നാൽ മനസുകൊണ്ടും സ്നേഹം കൊണ്ടും വലിയവരാണ്…. ഇത് പറയുമ്പോൾ പൗലോ ഗബ്രിയേൽ ഡാ സിൽവ ബാരോസിന്റെയും കറ്റിയൂസിയ ലി ഹോഷിനയുടെയും കണ്ണുകളിൽ സന്തോഷത്തിന്റെ തിളക്കമുണ്ടായിരുന്നു. ആത്മാർത്ഥമായ പ്രണയത്താൽ ബാരോസ് ഹോഷിനോയുടെ കൈ പിടിച്ചപ്പോൾ കൂടെ പോന്നത് ആകട്ടെ ഗിന്നസ് റെക്കോർഡും. ലോകത്തിലെ ഏറ്റവും ഉയരം കുറഞ്ഞ ദമ്പതികൾ എന്ന റെക്കോർഡ് ആണ് ബാരോസിനെയും ഹോഷിനോയെയും തേടിയെത്തിയിരിക്കുന്നത്. ഇതോടെ ബ്രസീലിയൻ സ്വദേശികളായ ഇവരുടെ പ്രണയം സോഷ്യൽ മീഡിയയിലും ചർച്ചയായി.
2006 ലാണ് 31 കാരനായ ബാരോസും 28 കാരിയായ ഹോഷിനയും തമ്മിൽ പരിചയപ്പെടുന്നത്. നിരന്തരം സന്ദേശങ്ങൾ അയക്കുന്ന ബാരോസിനെ ശല്യക്കാരനായിട്ടായിരുന്നു ആദ്യം ഹോഷിന കണ്ടത്. തുടർന്ന് ബാരോസിനെ ബ്ലോക്ക് ചെയ്യുന്ന സ്ഥിതിവിശേഷവും ഉണ്ടായി. എന്നാൽ പതിയെ ബാരോസ് ഹോഷിനയുടെ മനസ്സ് കീഴടക്കുകയായിരുന്നു.
സോഷ്യൽ മീഡിയയിൽ തളിരിട്ട പ്രണയത്തിന്റെ വേരുകൾ അതിവേഗം തന്നെ ഇരുവരുടെയും മനസ്സുകളിലേക്ക് ആഴ്ന്നിറങ്ങി. ഒരു രാജ്യത്തിന്റെ രണ്ട് അറ്റത്തായിരുന്നുവെങ്കിലും ദിവസങ്ങൾ കഴിയുന്തോറും ഇവർ തമ്മിലുള്ള ബന്ധം ശക്തമായിക്കൊണ്ടിരുന്നു. ഇതിനിടെ ഇരുവരും പരസ്പരം കാണാൻ തീരുമാനിക്കുകയായിരുന്നു. കൂടിക്കാഴ്ച വിവാഹം എന്ന തീരുമാനത്തിൽ കലാശിച്ചു. അങ്ങിനെ പത്ത് വർഷം നീണ്ട അടുപ്പത്തിനൊടുവിൽ 2016 ൽ ഇരുവരും വിവാഹിതരാകുകയായിരുന്നു.
വിവാഹ ശേഷം ഇരുവരും സമൂഹമാദ്ധ്യമങ്ങളിലൂൽെ സജീവമായിരുന്നു. ഉയരക്കുറവ് കൊണ്ട് ഒരുപാട് പരിഹാസങ്ങൾ സഹിച്ച ഇരുവരും തങ്ങളുടെ അതിജീവന കഥകൾ ലോകത്തിന് മുൻപിൽ തുറന്നുകാട്ടി. ഒപ്പം തങ്ങളുടെ പ്രണയവും സമൂഹമാദ്ധ്യമങ്ങളിലൂടെ പങ്കുവച്ച് പ്രണയത്തിന് ഒന്നും തടസ്സമല്ലെന്ന് ഉറക്കെ പ്രഖ്യാപിച്ചു. പരസ്പരം ധൈര്യവും പ്രോത്സാഹനവും നൽകിയായിരുന്നു ഇരുവരുടെയും പിന്നീടങ്ങോട്ടുള്ള ജീവിതം.
90. 28 സെന്റീമീറ്റർ അഥവാ 35. 54 ഇഞ്ചാ്ണ് ബാരാസിന്റെ ഉയരം. ഹോഷിനയ്ക്ക് ബാരാസിനെക്കാൾ ഒരു സെന്റീമീറ്റർ ഉയരം കൂടുതലാണ്. 91.13 സെന്റീമീറ്റർ ആണ് ഹോഷിനയുടെ ഉയരം. ലോകത്ത് ആദ്യമായാണ് ഇത്രയും ഉയരം കുറഞ്ഞവർ തമ്മിൽ വിവാഹം കഴിയ്ക്കുന്നത്. ഇതാണ് വർഷങ്ങൾക്ക് ശേഷം ഇരുവരെയും ഗിന്നസ് റെക്കോർഡിന് ഉടമകളാക്കിയതും. സർക്കാർ ജോലിക്കാരനാണ് ബാരോസ്. സ്വന്തമായി ബ്യൂട്ടി സലൂൺ നടത്തുകയാണ് ഹോഷിന…
വെല്ലുവിളികൾ ഇല്ലാതെ ജീവിതം ഇല്ലെന്നാണ് ഇരുവരും പറയുന്നത്. ഈ വെല്ലുവിളികളെ തരണം ചെയ്ത് മുന്നേറുന്നതാണ് സന്തോഷമെന്നും ഇരുവരും സ്വന്തം ജീവിതം കൊണ്ട് പറഞ്ഞുവയ്ക്കുന്നു.
Discussion about this post