ന്യൂഡൽഹി : ഗൂഗിളിന്റെ ജനറേറ്റീവ് എഐ ചാറ്റ്ബോട്ടായ ജെമിനി മൊബൈൽ ആപ്ലിക്കേഷൻ ഇനി ഇന്ത്യയിലും ലഭ്യമാകും. യുഎസിൽ ജെമിനി അവതരിപ്പിച്ച് നാലു മാസത്തിനു ശേഷമാണ് ആപ്പ് ഇന്ത്യയിലേക്ക് എത്തുന്നത്. ഇംഗ്ലീഷിനൊപ്പം ഒമ്പത് ഇന്ത്യൻ ഭാഷകളിലും ലഭ്യമാകും എന്നുള്ളതാണ് ഇന്ത്യയിൽ അവതരിപ്പിക്കുന്ന ആപ്പിന്റെ പ്രത്യേകത. ഡാറ്റാ വിശകലനങ്ങൾ, ഫയൽ അപ്‌ലോഡിംഗ്, എഐ ചാറ്റുകൾ എന്നിവയ്ക്ക് ഗൂഗിൾ അവതരിപ്പിക്കുന്ന നൂതന അവതരണം ആണ് ജെമിനി ആപ്പ്.
ഹിന്ദി, ബംഗാളി, ഗുജറാത്തി, കന്നഡ, മലയാളം, മറാത്തി, തമിഴ്, തെലുങ്ക്, ഉറുദു എന്നീ ഭാഷകളാണ് ഇംഗ്ലീഷിനോടൊപ്പം ഇന്ത്യയിൽ അവതരിപ്പിക്കുന്ന ജെമിനി ആപ്പിൽ ഉണ്ടായിരിക്കുക. AI അസിസ്റ്റൻ്റ് ജെമിനിയുടെ പ്രീമിയം പതിപ്പായ ജെമിനി അഡ്വാൻസ്ഡിൽ ആയിരിക്കും ഈ പ്രാദേശിക ഭാഷകൾ ലഭ്യമാകുന്നത്. ആൻഡ്രോയിഡ് ഉപയോക്താക്കൾക്ക് ഗൂഗിൾ പ്ലേ സ്റ്റോറിൽ നിന്ന് ജെമിനി ആപ്പ് ഡൗൺലോഡ് ചെയ്യാവുന്നതാണ്. ഇന്ത്യയിലെ ഐഫോൺ ഉപയോക്താക്കൾക്കും വൈകാതെ തന്നെ ഈ ആപ്പ് ആക്സസ് ചെയ്യാൻ കഴിയും.
നിങ്ങൾക്ക് ആവശ്യമായ സഹായങ്ങൾ ലഭ്യമാക്കുന്നതിനായി എഐ സാങ്കേതികവിദ്യ വഴി ടൈപ്പുചെയ്യാനും സംസാരിക്കാനും ചിത്രങ്ങൾ നിർമ്മിക്കുന്നതിനും ഈ അപ്ലിക്കേഷൻ നിങ്ങളെ സഹായിക്കുന്നു. പല മേഖലകളിലും അനന്തമായ സാധ്യതകൾ ആണ് ഈ ആപ്ലിക്കേഷൻ മുന്നോട്ടുവയ്ക്കുന്നത് എന്നും ഗൂഗിൾ സിഇഒ സുന്ദർ പിച്ചൈ എക്‌സിൽ ആപ്പിന്റെ ലോഞ്ച് പ്രഖ്യാപിച്ചുകൊണ്ട് വ്യക്തമാക്കി.
