മലപ്പുറം : ഭാരതപ്പുഴയിൽ കന്നുകാലികൾ കൂട്ടത്തോടെ ചത്തു പൊങ്ങി. ഭാരതപ്പുഴയുടെ ഭാഗമായ പാവറട്ടി കുടിവെള്ള സംഭരണിയിലാണ് കന്നുകാലികൾ കൂട്ടത്തോടെ ചത്തുപൊങ്ങിയതായി കണ്ടെത്തിയത്. പട്ടാമ്പി മുതൽ തൃത്താല വെള്ളിയാങ്കല്ല് വരെയുള്ള ഭാഗത്താണ് കന്നുകാലികളുടെ ജഡങ്ങൾ കണ്ടെത്തിയത്.
ഇതുവരെയായി 7 കന്നുകാലികളുടെ ജഡങ്ങളാണ് കണ്ടെത്തിയിട്ടുള്ളത്. പുഴയിലെ വെള്ളത്തിൽ നിന്നും അസഹനീയമായ ദുർഗന്ധം വഹിച്ചതിനെ തുടർന്ന് നാട്ടുകാർ നടത്തിയ പരിശോധനയിലാണ് കന്നുകാലികളുടെ ജഡങ്ങൾ കണ്ടെത്തിയത്. ദിവസങ്ങളോളം പഴക്കമുള്ള ഈ ജഡങ്ങൾ പുഴുവരിച്ച നിലയിലാണ് ഉണ്ടായിരുന്നത്.
കന്നുകാലികളുടെ അഴുകിയ ജഡങ്ങൾ പുഴയിൽ കണ്ടെത്തിയതോടെ ജനങ്ങൾ ആശങ്കയിലാണ്. ഈ മേഖലയിൽ നിന്നുമാണ് സമീപത്തെ വിവിധ പ്രദേശങ്ങളിലേക്ക് കുടിവെള്ളം എത്തിക്കുന്നത്. കന്നുകാലികളുടെ ജഡങ്ങൾ കണ്ടെത്തിയ സാഹചര്യത്തിൽ ഇവിടെ നിന്നുമുള്ള കുടിവെള്ള വിതരണം നിർത്തി വയ്ക്കണമെന്ന് നാട്ടുകാർ ആവശ്യപ്പെട്ടു.
Discussion about this post