എറണാകുളം : താര സംഘടനയായ അമ്മയുടെ ജനറൽ സെക്രട്ടറി സ്ഥാനത്തേക്ക് നടന്ന തിരഞ്ഞെടുപ്പിൽ നടൻ സിദ്ദിഖിന് വൻവിജയം. കൊച്ചി ഗോകുലം കൺവെൻഷൻ സെന്ററിൽ നടന്ന വാർഷിക പൊതുയോഗത്തിൽ വോട്ടെടുപ്പിലൂടെയാണ് സിദ്ദിഖ് തിരഞ്ഞെടുക്കപ്പെട്ടത് . രാജിവെച്ച ഇടവേള ബാബുവിന്റെ പിൻഗാമി ആയിട്ടാണ് സിദ്ദിഖ് ജനറൽ സെക്രട്ടറി സ്ഥാനത്തേക്ക് എത്തുന്നത്.
മൂന്നുവർഷത്തിൽ ഒരിക്കൽ നടക്കുന്ന അമ്മയുടെ വാർഷിക പൊതുയോഗം ആണ് കൊച്ചി ഗോകുലം കൺവെൻഷൻ സെന്ററിൽ നടന്നത്. നേതൃസ്ഥാനങ്ങളിലേക്കുള്ള തിരഞ്ഞെടുപ്പിൽ വൈസ് പ്രസിഡണ്ട് സ്ഥാനത്തേക്ക് നടൻ ജഗദീഷും ജയൻ ചേർത്തലയും തിരഞ്ഞെടുക്കപ്പെട്ടു. നേരത്തെ പ്രസിഡണ്ട് സ്ഥാനത്തേക്ക് മോഹൻലാലും ട്രഷറർ സ്ഥാനത്തേക്ക് ഉണ്ണി മുകുന്ദനും എതിരില്ലാതെ തിരഞ്ഞെടുക്കപ്പെട്ടിരുന്നു.
ജനറൽ സെക്രട്ടറി സ്ഥാനത്തേക്ക് കടുത്ത മത്സരമായിരുന്നു നടന്നിരുന്നത്. സിദ്ദിഖിനെതിരായി മത്സരിച്ചിരുന്നത് കുക്കു പരമേശ്വരൻ, ഉണ്ണി ശിവപാൽ എന്നിവരായിരുന്നു. എന്നാൽ ഔദ്യോഗിക പക്ഷത്തിന്റെ പിന്തുണയോടെ തന്നെ സിദ്ദിഖ് തിരഞ്ഞെടുക്കപെടുകയായിരുന്നു. വൈസ് പ്രസിഡണ്ട് സ്ഥാനത്തേക്ക് നടി മഞ്ജുപിള്ള മത്സരിച്ചിരുന്നെങ്കിലും പരാജയപ്പെട്ടു.
