ന്യൂഡൽഹി : ടി20 ലോകകപ്പ് നേടിയ ടീമിന് സമ്മാനമായി 125 കോടി രൂപ നൽകുമെന്ന് ബിസിസിഐ സെക്രട്ടറി ജയ് ഷാ. ടീം ഇന്ത്യയുടെ ആഗോള വേദിയിലെ ശ്രദ്ധേയമായ നേട്ടങ്ങളിൽ വളരെയധികം അഭിമാനവും ആദരവുമാണ് തോന്നുന്നത്. വിമർശകരുടെ വായടപ്പിക്കുന്ന ജയമാണ് ഇന്ത്യൻ ടീം നേടിയത് എന്നും ജയ് ഷാ വ്യക്തമാക്കി.
ലോകത്തിലെ തന്നെ ഏറ്റവും സമ്പന്നമായ ക്രിക്കറ്റ് ഭരണസമിതി എന്ന നിലയിൽ എല്ലായ്പ്പോഴും ശ്രദ്ധ നേടാറുണ്ട് ബിസിസിഐ. ഇപ്പോൾ ലോകകപ്പ് നേടുന്ന ടീമിന് നൽകുന്ന സമ്മാനത്തിന്റെ കാര്യത്തിലും തങ്ങൾ ലോകത്തിലെ തന്നെ ഏറ്റവും ഉന്നതിയിൽ ആണെന്ന് കാണിക്കുകയാണ് ബിസിസിഐ സെക്രട്ടറി ജയ് ഷാ. തന്റെ എക്സ് അക്കൗണ്ടിൽ കുറിച്ച ഒരു പോസ്റ്റിലൂടെയാണ് ജയ് ഷാ ടീമിന്റെ സമ്മാനത്തെ കുറിച്ച് വ്യക്തമാക്കിയത്. “2024 ലെ ഐസിസി പുരുഷ ടി20 ലോകകപ്പ് നേടിയതിന് ടീം ഇന്ത്യക്ക് 125 കോടി രൂപ സമ്മാനത്തുക പ്രഖ്യാപിക്കുന്നതിൽ എനിക്ക് സന്തോഷമുണ്ട്. ടൂർണമെൻ്റിലുടനീളം ടീം അസാധാരണമായ കഴിവും നിശ്ചയദാർഢ്യവും കായികക്ഷമതയും പ്രകടിപ്പിച്ചു. ഈ മികച്ച നേട്ടത്തിന് എല്ലാ കളിക്കാർക്കും പരിശീലകർക്കും സപ്പോർട്ട് സ്റ്റാഫിനും
അഭിനന്ദനങ്ങൾ!” എന്നും ജയ് ഷാ വ്യക്തമാക്കി.
“ഈ ടീം യഥാർത്ഥത്തിൽ വളർന്നുവരുന്ന, ഊർജ്ജസ്വലമായ, പ്രതിരോധശേഷിയുള്ള ഇന്ത്യയെ ലോകത്തിനു മുൻപിൽ വെളിപ്പെടുത്തുന്നതാണ്. ക്രിക്കറ്റ് ലോകത്ത് അതിൻ്റെ ശരിയായ സ്ഥാനം ഉറപ്പിച്ചുകൊണ്ട് ഇന്ത്യയിലെ കായികരംഗത്തെ ഭരണസമിതി എന്ന നിലയിൽ, ഈ ടീമിൻ്റെ വിജയത്തിൽ ബിസിസിഐ ഒരു പങ്കുവഹിച്ചതിൽ എനിക്ക് സന്തോഷമുണ്ട്. ശരിയായ പ്രതിഭകളെ തിരിച്ചറിയുന്നതിനും പരിപോഷിപ്പിക്കുന്നതിനുമുള്ള ശ്രദ്ധയും പരിശ്രമവും കൊണ്ട് ടീം ഇന്ത്യ നമ്മെയെല്ലാം അപാരമായ അഭിമാനം കൊണ്ട് നിറയ്ക്കുന്നു” എന്നും ജയ് ഷാ വ്യക്തമാക്കി.
Discussion about this post