തിരുവനന്തപുരം : വിഴിഞ്ഞം തുറമുഖത്തെ ട്രയൽ റൺ ഉദ്ഘാടന ചടങ്ങിൽ വച്ച് മുഖ്യമന്ത്രി പിണറായി വിജയനെ പുകഴ്ത്തി സംസാരിച്ച ദിവ്യ എസ് അയ്യർ ഐഎഎസിനെതിരെ വിമർശനവുമായി ഡോ. പി സരിൻ. ദിവ്യയ്ക്ക് പ്രായവും അനുഭവവും ചെറുതായതിന്റെ ധാരണപ്പിശക് ആണെന്നാണ് സരിൻ അഭിപ്രായപ്പെട്ടത്. കെപിസിസി ഡിജിറ്റൽ മീഡിയ കൺവീനർ ആണ് ഡോ. പി സരിൻ.
വൻകിട പദ്ധതികൾ കടലാസിൽ ഒതുങ്ങുന്ന കാലം ഇന്ന് മറന്നിരിക്കുന്നു എന്നായിരുന്നു പിണറായി വിജയനെ പുകഴ്ത്തിക്കൊണ്ട് കഴിഞ്ഞ ദിവസം ദിവ്യ എസ് അയ്യർ പറഞ്ഞിരുന്നത്. ഇത് അസാധ്യമായത് യാഥാർത്ഥ്യമാകുന്ന കാലമാണെന്നും ദിവ്യ ചടങ്ങിൽ വ്യക്തമാക്കിയിരുന്നു. ദിവ്യയുടെ ഈ വാക്കുകൾക്കെതിരായാണ് സരിൻ ഫേസ്ബുക്കിലൂടെ പ്രതികരിച്ചത്.
“കടലാസിൽ ഒതുങ്ങാതെ പുറം ലോകം കണ്ട ഒട്ടനവധി പദ്ധതികൾ ഈ കേരളത്തിൽ മുൻപും നടപ്പിലാക്കിയിട്ടുണ്ട്. ലിസ്റ്റ് ഞാനായിട്ട് പറയുന്നില്ല.
ഒന്ന് മാത്രം പറയാം : മുൻപും മിടുക്കരായ IAS ഉദ്യോഗസ്ഥർ കേരളത്തിൽ പണിയെടുത്തിട്ടുണ്ട്. അവരോട് ചോദിച്ച് നോക്കിയാൽ മതി പറഞ്ഞു തരും, കേരളത്തെ നയിച്ച ദീർഘവീക്ഷണമുള്ള മുഖ്യമന്ത്രിമാരുടെ പേരുകൾ.
പ്രായവും അനുഭവവും ചെറുതായതുകൊണ്ടാണ് ഇത്തരം ധാരണപ്പിശകുകൾ ഉണ്ടാകുന്നത്.
തിരുത്തുമല്ലോ. എന്നായിരുന്നു സരിൻ തന്റെ ഫേസ്ബുക്ക് പോസ്റ്റിൽ വ്യക്തമാക്കിയത്.
Discussion about this post