പാറ്റ്ന: ബിഹാർ മുൻ മുഖ്യമന്ത്രിയും ആർജെഡി അധ്യക്ഷനുമായ ലാലു പ്രസാദ് യാദവിനും കുടുംബത്തിനും ‘ലാൻഡ് ഫോർ ജോബ്സ്’ അഴിമതിക്കേസിൽ പ്രശ്നങ്ങൾ അടുത്തൊന്നും അവസാനിക്കുമെന്ന് തോന്നുന്നില്ല. ‘ലാൻഡ് ഫോർ ജോബ്സ്’ കള്ളപ്പണം വെളുപ്പിക്കൽ കേസിൽ ലാലു പ്രസാദ് യാദവ്, അദ്ദേഹത്തിൻ്റെ മകനും ബീഹാർ മുൻ ഉപമുഖ്യമന്ത്രിയുമായ തേജസ്വി യാദവ്, തേജ് പ്രതാപ് യാദവ്, മറ്റ് ആറ് പേർ എന്നിവർക്കെതിരെ ബുധനാഴ്ച പുതിയ സമൻസ് അയച്ച് ഡൽഹി കോടതി.
പ്രതികളോട് ഒക്ടോബർ 7ന് കോടതിയിൽ ഹാജരാകാൻ പ്രത്യേക ജഡ്ജി വിശാൽ ഗോഗ്നെ നിർദ്ദേശിച്ചു. ഒരു അനുബന്ധ കുറ്റപത്രം കൂടി പരിഗണിച്ചാണ് ജഡ്ജി ഉത്തരവ് പുറപ്പെടുവിച്ചത് . അന്തിമ റിപ്പോർട്ട് എൻഫോഴ്സ്മെൻ്റ് ഡയറക്ടറേറ്റ് (ഇഡി) ഓഗസ്റ്റ് 6 ന് കോടതിയിൽ സമർപ്പിച്ചിരുന്നു . സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ (സിബിഐ) സമർപ്പിച്ച എഫ്ഐആറിൻ്റെ അടിസ്ഥാനത്തിലാണ് കേന്ദ്ര അന്വേഷണ ഏജൻസി കേസ് ഫയൽ ചെയ്തത്.
2004 മുതൽ 2009 വരെ ലാലു പ്രസാദ് റെയിൽവേ മന്ത്രിയായിരിക്കെയാണ് കേസിനാസ്പദമായ സംഭവം നടക്കുന്നത്. മധ്യപ്രദേശിലെ ജബൽപൂർ ആസ്ഥാനമായി പ്രവർത്തിക്കുന്ന റെയിൽവേയുടെ വെസ്റ്റ് സെൻട്രൽ സോണിൽ നടത്തിയ ഗ്രൂപ്പ്-ഡി നിയമനങ്ങളാണ് ഇപ്പോൾ കോടതിയുടെ പരിഗണനയിൽ ഉള്ളത്. ഇത്തരത്തിൽ റിക്രൂട്ട് ചെയ്തവർ ജോലിക്ക് പകരമായി ലാലുപ്രസാദ് യാദവിന്റെ കുടുംബങ്ങൾക്കും ആശ്രിതർക്കുമായി ഭൂമി സമ്മാനമായി നൽകുകയോ കൈമാറ്റം ചെയ്യുകയോ ചെയ്തു എന്നാണ് കേസ്.
Discussion about this post